Истанбулдаги Аё София масжидига кириш 2024 йил 15 январдан бошлаб пулли бўлади. Бу ҳақда Туркия маданият ва туризм вазири Меҳмет Нури Эрсойга таяниб, Daily Sabah хабар берди.
Шу билан бирга, ибодат қилиш учун келган Туркия фуқаролари учун масжидга кириш бепуллигича қолади. Сайёҳлар учун Аё Софияни зиёрат қилиш қанчага тушиши ҳозирча маълум эмас.
“Биз Аё София масжидида ташриф буюрувчиларни бошқариш тизимидан фойдаланишга ўтмоқдамиз. Зиёрат сифати ва хавфсизлиги ортади”, — дея таъкидлади вазир.
1934 йилда Туркиянинг биринчи президенти Мустафо Камол Отатуркнинг қарори билан Аё София собори музей мақомини олди.
2020 йилда Туркия президенти Ражаб Тоййиб Эрдўғон ушбу жойдан масжид сифатида фойдаланишга қарор қилди.
Шундан сўнг, Аё Софияга кириш барча ташриф буюрувчилар, шу жумладан, сайёҳлар учун бепул бўлди. Масжид мақомини олишдан олдин, объектга музей абонементи ёки кассадан чипта сотиб олиш орқали кириш мумкин эди.
Эслатиб ўтамиз, бир неча йил аввал Анқаранинг Аё Софияни ўзгартириш тўғрисидаги қарори Грецияда норозиликка сабаб бўлганди. Вазият шу даражага етдики, икки давлат ҳукуматлари кескин баёнотлар алмашди. Эрдўғон Аё Софияда жума намозида қатнашган пайтда, Грециядаги намойишчилар Туркия байроғини ёқиб юборган.
Изоҳ (0)