“Marsel” va “Lion” o‘rtasidagi uchrashuv noma’lum muddatga qoldirildi. Mehmonlar avtobusi marsellik muxlislar tomonidan toshbo‘ron qilindi

Futbol bo‘yicha Fransiya chempionatining 10-turida “Marsel” va “Lion” jamoalari o‘zaro kurash olib borishi kerak edi. 

Le Parisien nashrining xabariga ko‘ra, “Lion” avtobusi “Velodrom” stadioniga yo‘l olgan vaqtda muxlislar tomonidan toshbo‘ron qilingan. Avtobusning oynalari sinib ketgan. Siniqlardan biri “Lion” bosh murabbiyi Fabio Grossoning yuzini shikastlagan. Shuningdek, Grossoning yordamchisi Raffael Longo ham jarohatlangan. 

Jamoa avtobusidan tashqari, “Lion” muxlislari ham 3 ta avtobusda uchrashuvga tashrif buyurgan. “Marsel” muxlislari u avtobuslarni ham toshbo‘ron qilgan. 

Shu sababli uchrashuv boshqa sanaga qoldirildi.

Ortda qolgan 9 turdan so‘ng “Lion” 3 ochko jamg‘argan holda eng so‘nggi o‘rinni egallab turibdi. “Marsel” esa 12 ochko bilan 9-pog‘onani band etgan.