Samarqandda yo‘lovchi tashuvchi avtobus bir guruh shaxslar tomonidan toshbo‘ron qilindi (video)

Samarqand viloyati IIB matbuot kotibi Jahongir Sagdullayev avtobusning toshbo‘ron qilinishi tasvirlangan videoga munosabat bildirdi.

Ijtimoiy tarmoqlarda davlat raqam belgilari yechilgan bir nechta yengil mashina serqatnov avtomobil yo‘lida avtobus yo‘lini to‘sgani tasvirlangan video tarqaldi. Mashinadan tushgan shaxslar qo‘llarida tosh bilan avtobusga shikast yetkazgan. 

Sagdullayevga ko‘ra, Oqdaryo tumani hududidan o‘tuvchi yo‘lda bir guruh fuqarolar yo‘lovchi tashuvchi avtobus yo‘lini to‘sib, oynasiga tosh otgani holatining sabablari viloyat IIB tomonidan o‘rganilmoqda.

“O‘rganishlar yakuni bilan ushbu holatda ishtirok etgan barcha shaxslarning harakatlariga huquqiy baho beriladi”, — deb yozadi u.

Bundan oldin Toshkent shahri Yakkasaroy tumanida 30 ga yaqin yigit ishtirokida ommaviy janjal sodir bo‘lgani, Samarqandda ommaviy janjal sodir bo‘lgani aks etgan videoga izoh berilgani, Farg‘onada suv talashib, tanishini toshbo‘ron qilgan shaxslarga nisbatan jinoiy ish ochilgani to‘g‘risida xabar berilgandi.