“Марсель” ва “Лион” ўртасидаги учрашув номаълум муддатга қолдирилди. Меҳмонлар автобуси марселлик мухлислар томонидан тошбўрон қилинди

Футбол бўйича Франция чемпионатининг 10-турида “Марсель” ва “Лион” жамоалари ўзаро кураш олиб бориши керак эди. 

Le Parisien нашрининг хабарига кўра, “Лион” автобуси “Велодром” стадионига йўл олган вақтда мухлислар томонидан тошбўрон қилинган. Автобуснинг ойналари синиб кетган. Синиқлардан бири “Лион” бош мураббийи Фабио Гроссонинг юзини шикастлаган. Шунингдек, Гроссонинг ёрдамчиси Раффаэл Лонго ҳам жароҳатланган. 

Жамоа автобусидан ташқари, “Лион” мухлислари ҳам 3 та автобусда учрашувга ташриф буюрган. “Марсель” мухлислари у автобусларни ҳам тошбўрон қилган. 

Шу сабабли учрашув бошқа санага қолдирилди.

Ортда қолган 9 турдан сўнг “Лион” 3 очко жамғарган ҳолда энг сўнгги ўринни эгаллаб турибди. “Марсель” эса 12 очко билан 9-поғонани банд этган.