Oliy Majlis Senati Kengashining navbatdagi majlisida Senatning qirq oltinchi yalpi majlisini 27-oktyabr kuni chaqirish to‘g‘risida qaror qabul qilindi. Bu haqda parlament yuqori palatasi matbuot xizmati xabar berdi.
Yalpi majlisda “Probatsiya to‘g‘risida”gi, “Yo‘l harakati to‘g‘risida”gi, sud qarorlarining qonuniyligi, asosliligi va adolatliligini tekshirish instituti takomillashtirilishi munosabati Fuqarolik protsessual, Iqtisodiy protsessual, Maʼmuriy sud ishlarini yuritish, Maʼmuriy javobgarlik to‘g‘risidagi kodekslarga o‘zgartirish va qo‘shimchalar kiritish haqidagi to‘rtta qonun ko‘rib chiqiladi.
Shuningdek, “O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida”gi, “O‘zbekiston Respublikasining ayrim qonun hujjatlariga dehqon xo‘jaligini yuritish uchun ajratiladigan yer uchastkalarining o‘lchamini oshirishga qaratilgan o‘zgartirishlar va qo‘shimcha kiritish to‘g‘risida”gi va “Qo‘riqlash faoliyati to‘g‘risida”gi qonuni qabul qilinishi munosabati bilan ayrim qonun hujjatlariga o‘zgartishlar kiritish haqidagi qonunlarni ham muhokama qilinishi rejalashtirilgan.
Bundan tashqari, yalpi majlisda “Turkiy investitsiya jamg‘armasini taʼsis etish to‘g‘risidagi bitimni (Anqara, 2023-yil 16-mart) ratifikatsiya qilish haqida”gi qonun hamda Oliy Majlisning Bola huquqlari bo‘yicha vakilini (Bolalar ombudsmanini) saylash to‘g‘risidagi masala ham ko‘rib chiqilishi ko‘zda tutilgan.
Oktyabr o‘rtalarida Ichki ishlar vazirligi “Yo‘l harakati xavfsizligini taʼminlash sohasini yanada rivojlantirishga doir qo‘shimcha chora-tadbirlar to‘g‘risida”gi hukumat qarori loyihasini muhokamaga qo‘ygandi. Undan oldinroq esa Vazirlar Mahkamasining “Yo‘l harakati qoidalariga o‘zgartirish va qo‘shimchalar kiritish haqida”gi qarori loyihasi eʼlon qilingan edi. Hujjat bilan “skuter” va “individual harakatlanish vositalari” tushunchalariga taʼrif berilib, ularning qaysi toifadagi transport vositasi turiga kirishiga aniqlik kiritilmoqda.
Izoh (0)