Tashqi mehnat migratsiyasi agentligi Janubiy Koreyada nelegal bo‘lib turgan o‘zbekistonliklarga jarima va ushbu mamlakatga qayta kirish taqiqlaridan ozod bo‘lish imkoniyati haqida ma’lumot berdi.
Qayd etilishicha, Janubiy Koreya Adliya vazirligi qarori bilan ushbu davlatda noqonuniy holatda bo‘lib turgan xorijliklar uchun ixtiyoriy ravishda chiqib ketishning maxsus qoidasi kuchga kirdi. Unga ko‘ra, 2023-yil 9-dekabrgacha ushbu davlatdan ixtiyoriy ravishda chiqib ketgan noqonuniy xorijliklar jarima va qayta kirish taqiqlaridan ozod qilinadi.
“Agar siz mazkur davlatda noqonuniy holatda istiqomat qilayotgan bo‘lsangiz, ushbu imkoniyatdan foydalanib, Koreya Respublikasiga rasmiy ravishda turli vizalar orqali kirib kelish imkoniyatiga ega bo‘lishingiz mumkin”, — deyiladi agentlik xabarida.
Ushbu chora-tadbirlar noqonuniy immigratsiyaga qarshi kurashish, chet ellik ishchilarni jalb etishning tegishli va qonuniy tizimlarini taʼminlash, noqonuniy mehnat migratsiyasiga qarshi choralar ko‘rish, malakali ishchilar sonini ko‘paytirish va chet ellik ishchilarni mavsumiy ishlarga muammosiz jalb etishga qaratilgan.
Fuqaro immigratsiya xizmatiga boradi, “ixtiyoriy ariza shakli” hujjatini to‘ldirib, masʼul xodimga topshiradi. Masʼul xodim fuqaroga tasdiqnoma beradi. Ushbu hujjat Koreyadan chiqib ketish chog‘ida aeroport masʼul xodimiga ko‘rsatiladi va noqonuniy migrantlar uchun tashkil etilgan “yashil yo‘lak” orqali o‘z yurtiga ketadi.
Izoh (0)