Toshkent metropoliteni “Yerusti halqa yo‘li” yo‘nalishining II bosqichidagi Quruvchilar dahasidan Sergeli mavzesigacha bo‘lgan Turon (13-bekat) va Qipchoq (14-bekat) metro bekatlarida qurilish ishlarining so‘nggi bosqichi amalga oshirilmoqda. Bu haqda Toshkent metropoliteni matbuot xizmati xabar berdi.
Shu munosabat bilan ushbu yangi bekatlarni yo‘nalishdagi mavjud bekatlar bilan texnik jihatdan o‘zaro bog‘lash maqsadida, 3-5-noyabr kunlari 3 kun muddatga, “Yer usti halqa yo‘li” yo‘nalishining “Tolariq” (10-bekat), “Xonobod” (11-bekat) va “Quruvchilar” (12-bekat) bekatlarida poyezdlar harakati to‘xtatiladi.
Bu kunlarda “Yerusti halqa yo‘li” yo‘nalishida poyezdlar poyezdlar harakati “Texnopark” (Do‘stlik-2) — “Qiyot” (9-bekat) bekatlari oralig‘ida tashkil etiladi.
Shuningdek, yo‘lovchilarga “Qiyot” (9-bekat) — “Quruvchilar” (12-bekat) bekatlari oralig‘ida bepul xizmat ko‘rsatuvchi qo‘shimcha avtobuslar harakati yo‘lga qo‘yiladi.
“Keltirilgan noqulaylik yuzasidan yo‘lovchilardan uzr so‘raymiz”, — deyiladi xabarda.
Eslatib o‘tamiz, Toshkent metropolitenining yerusti yo‘nalishida ikki bekat oralig‘ida 2-oktyabr kuni poyezd harakati vaqtincha to‘xtatilgandi.
Izoh (0)