O‘zbekiston bosh vaziri Abdulla Aripov Bishkekda Belarus bosh vaziri Roman Golovchenko bilan uchrashdi, deb xabar bermoqda hukumat portali.
Qirg‘iziston poytaxtida SHHT, MDH va Yevrosiyo iqtisodiy ittifoqi hukumat rahbarlari kengashining navbatdagi yig‘ilishlari bo‘lib o‘tmoqda.
Tadbir doirasida Abdulla Aripov boshchiligidagi hukumat delegatsiyasi Belarus bosh vaziri Roman Golovchenko bilan ikki tomonlama uchrashuv o‘tkazdi. Qayd etilishicha, ko‘p qirrali aloqalar rivojlanishida ikki davlat rahbarlari o‘rtasidagi ochiq va ishonchli muloqot muhim omil bo‘lmoqda.
Uchrashuvda O‘zbekiston tomoni ikki tomonlama hamkorlik bo‘yicha hukumatlararo komissiyaning o‘ninchi yig‘ilishini va ikkinchi mintaqalararo forumini yil oxirigacha Toshkentda o‘tkazishni taklif qildi.
O‘zaro tovar ayirboshlash ko‘rsatkichlari o‘smoqda, o‘tgan yilda uning xajmi 42 foizga o‘sdi. Oliy darajadagi muzokaralar davomida hukumatlar zimmasiga yaqin yillarda tovar ayirboshlash hajmini 1 milliard dollarga yetkazish vazifasi qo‘yilgan.
Uchrashuvda, shuningdek, savdo-sotiq va korxonalar o‘rtasida sanoat kooperatsiyasini kengaytirish, qishloq xo‘jaligi va madaniy-gumanitar sohalardagi hamkorlikni rivojlantirishga qaratilgan vazifalar ijrosini ta’minlash bo‘yicha birgalikdagi sa’y-harakatlar yuzasidan o‘zaro fikr almashildi.
Izoh (0)