O‘zbekiston Ichki ishlar vazirligi biznes-trener Islom Ibrohimovni qidiruvga berdi. Unga oid ma’lumotlar idora saytiga joylashtirilgan.
Qayd etilishicha, Ibrohimov Jinoyat kodeksining 168-modda (firibgarlik) 4-qismi, “a” bandi bilan ayblanmoqda. Ushbu modda bilan aybdor deb topilganlar BHMning 600 baravarigacha jarimaga tortilishi yoki 10 yilgacha ozodlikdan mahrum etilishi mumkin.
Islom Ibrohimov 1996-yili Buxoro viloyati Shofirkon tumanida tug‘ilgan. 2021-yilda “Yoshlar” telekanalining Start up club loyihasiga bergan intervyusida u o‘rta maxsus ta’limni Toshkent shahridagi Yuridik kollejida olgani, aktyor bo‘lish maqsadida Konservatoriyaga topshirib, kira olmagani haqida so‘zlab bergan.
2022-yilda Islom Ibrohimov tadbirkorlikni o‘rgatadigan Business Invest biznes-markazini ochgandi. Shuningdek, u YouTube’dagi motivatsion roliklari bilan tanilgan. Shu kabi videolarining birida u bir oyda 10 ming dollar topish yo‘lini o‘rgatgan. Uning usuli va yo‘nalishi ijtimoiy tarmoqlarda ko‘p bora tanqid qilinib, kulgiga olingandi.
2022-yilda blogerlar, xususan, “Subyektiv” loyihasi mualliflari O‘zbekistonda “biznes-trening” nomi bilan kurslar sotayotganini, ular orasida o‘zi haqida yolg‘on maʼlumot tarqatish orqali ko‘proq mijoz yig‘ayotganlar haqida so‘z yuritib, Islom Ibrohimov masalasiga alohida to‘xtalib o‘tgandi.
“Daryo” biznes-trener Islom Ibrohimovning qidiruvga berilishiga o‘sha paytda ko‘rsatilgan faktlar sabab bo‘lganmi yoki boshqa firibgarlik masalasida gumonlanayaptimi degan savollarga javob topish maqsadida bu masalada Ichki ishlar vazirligi axborot xizmati rahbari Shohrux G‘iyosov bilan bog‘landi. Masʼul hozircha boshqa ma’lumot bera olmasligini ma’lum qildi.
Izoh (0)