Davlat xavfsizlik xizmati Xorazm, Buxoro va Toshkent viloyatida noqonuniy giyohvand moddalar savdosi bilan bog‘liq holatlarga chek qo‘ydi, deb xabar beradi O‘zA.
Qayd etilishicha, DXXning Xorazm viloyati bo‘yicha boshqarmasi xodimlari tomonidan boshqa huquqni muhofaza qiluvchi idoralar bilan hamkorlikda tezkor tadbir o‘tkazilgan. Tadbirda Xazorasp tumanida yashovchi fuqaro boshqaruvidagi Cobalt rusumli avtomashina to‘xtatilib, xolislar ishtirokida ko‘zdan kechirilgan. Natijada, uning salonida jami 6 bo‘lakda 3 kilogramm 982 gramm opiy giyohvandlik vositasi borligi aniqlanib, protsessual tartibda rasmiylashtirib olingan.
Tezkor surishtiruv harakatlari davomida mazkur shaxs Tojikistondan keltirilgan ushbu ajal og‘usini Surxondaryo viloyatining Sariosiyo tumanida yashovchi ikki nafar fuqarodan olganligi maʼlum bo‘lib, Xazorasp tumanidagi mehmonxonaning ular joylashgan xonasidan sotish uchun mo‘ljallangan 1 kilogramm 952 gramm opiy moddasi ham tegishli tartibda rasmiylashtirib olingan.
Shuningdek, tezkor tadbir davom ettirilib, ushbu giyohvandlik vositasini sotib olgan vaqtlarida yana ikki nafar xazorasplik narkosavdogarlar ushlangan.
Buxoro viloyatida qayd etilgan holatda esa G‘ijduvon tumanida yashovchi, 1973 va 1975-yillarda tug‘ilgan, muqaddam sudlangan ikki nafar fuqaro Buxoro shahrida 1 kilogramm 224 gramm opiy moddasini 50 ming dollarga sotgan vaqtlarida Davlat xavfsizlik xizmati va bojxona organlari xodimlari tomonidan ashyoviy dalillar bilan ushlangan.
Davlat xavfsizlik xizmatining Toshkent viloyati bo‘yicha boshqarmasi hamda viloyat bojxona boshqarmasi xodimlari hamkorligida o‘tkazilgan tezkor tadbirda, Bo‘ka tumani hududida harakatlanayotgan Nexia rusumli avtotransport vositasi to‘xtatilib, tekshirilgan.
Natijada unda yo‘lovchi sifatida ketayotgan, Farg‘ona viloyatining Bag‘dod tumanida yashovchi, 33 yoshli fuqaro yonida 1,9 kilogramm gashish moddasi borligi aniqlanib, protsessual tartibda rasmiylashtirib olingan.
Ushbu ajal og‘usi tojikistonlik narkokuryerlar tomonidan kontrabanda yo‘li bilan Toshkent viloyatiga olib kelinib, xufiya joyga qoldirib ketilgan.
Hozirda mazkur shaxslarga nisbatan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
Avgust boshlarida DXX Samarqand viloyatida giyohvand moddalar oldi-sotdisi bilan shug‘ullanib kelgan guruhni qo‘lga olgandi. O‘shanda Urgut tumanida yashovchi 1978 va 1986-yillarda tug‘ilgan opa-singil 911 gramm opiy giyohvandlik moddasini 12 ming AQSH dollariga sotgan vaqtida ushlangan. Shuningdek, Toshkentda Kia mashinasida narkokuryerlik bilan shug‘ullangan shaxs ushlangani to‘g‘risida xabar berilgandi.
Izoh (0)