“Asosli biron bir hujjat ma’lum emas”. Shota Rustaveli ko‘chasidagi “tarixiy uy” buzilayotganiga munosabat bildirildi

Yakkasaroy tumani hokimligi Shota Rustaveli ko‘chasidagi “tarixiy uy”ning buzilishiga ruxsat berilgani aytilgan xabarlarga munosabat bildirdi.

Bloger Nikita Makarenko Toshkent shahar hokimligi Shota Rustaveli ko‘chasidagi 22-sonli tarixiy uyni buzishga ruxsat bergani haqida yozdi. Bino “Okean” do‘konining o‘ng tomonida joylashgan. Uning o‘rniga yangi bino qurish rejalashtirilmoqda.

“Mazkur uy madaniy meros ro‘yxatiga kiritilmagan, ammo mutaxassislar hukumatdan bir necha bor Rustaveli ko‘chasidagi butun ansamblni, xususan, ushbu uyni ham ro‘yxatga kiritishni talab qilgan”, — deb yozadi bloger.

 Makarenkoning qayd etishicha, hozirga qadar ushbu davrda qurilgan uylardan birortasi buzilmagan.

Yakkasaroy tuman hokimligining ma’lum qilishicha, yuqoridagi holat bo‘yicha Yakkasaroy tuman hokimligiga asosli biron bir hujjat ma’lum emas.

“Yuqoridagi manzilda hech qanaqa buzilish ishlari olib borilmayotganini ma’lum qilamiz”, — deyiladi munosabatda.

Avvalroq Toshkentning Hamid Olimjon maydonidagi “Moskva” uylari nomi bilan mashhur bo‘lgan ko‘p qavatli uylar rekonstruksiya qilinishi mumkinligi to‘g‘risida xabar berilgandi. Mazkur uyda yashovchilar bir kun avval hokimlik vakillari taqdim etgan binolarni rekonstruksiya qilish eskizlarini jo‘natgan.