Rossiya terma jamoasi Senegal, Tanzaniya va Zanzibarga qarshi o‘rtoqlik o‘yinlari o‘tkazishi mumkin

Rossiya futbol ittifoqi bir qancha Afrika terma jamoalari bilan o‘rtoqlik o‘yini o‘tkazish bo‘yicha muzokaralar olib bormoqda. 

“Sport-Ekspress” nashrining xabariga ko‘ra, RFI Senegal bilan muzokara o‘tkazmoqda. Manbaning ma’lum qilishicha, terma jamoalar noyabr oyidagi xalqaro tanaffusda o‘zaro o‘yin o‘tkazish ehtimoli kichik, ammo 2024-yilda bu uchrashuv bo‘lib o‘tadi. 

Shuningdek, RFI Zanzibar bilan ham muzokara olib bormoqda. Zanzibar FIFA a’zoligiga kirmaydi, Tanzaniya respublikasi tarkibida avtonom hisoblanadi. Shu sababli Tanzaniya terma jamoasi a’zolari Zanzibar safida o‘ynashi mumkin. Undan tashqari Tanzaniya terma jamoasining o‘zi ham Rossiya bilan o‘rtoqlik o‘yini o‘tkazishga qiziqish bildirmoqda. 

Sudan va Seyshel orollari ham 2024-yilda Rossiya terma jamoasi bilan o‘rtoqlik o‘yinida ishtirok etishi mumkin, deya xabar beradi “Match TV”. 

Futbol bo‘yicha SSSR terma jamoasining sobiq futbolchisi Anzor Kavazashvili bunday vaziyatda Rossiya terma jamoasi istalgan jamoa bilan o‘ynashi shart deb hisoblaydi.

“Hozir raqib tanlaydigan vaqt emas: Zanzibarmi, Gvineyami, Chadmi farqi yo‘q. Bu terma jamoalar Rossiya bilan o‘ynashga loyiq emas deydiganlar adashmoqda”, — aytib o‘tdi Kavazashvili. 

FIFA va UEFA 2022-yil bahorida Rossiya terma jamoasini chetlatgandi, shuningdek, Rossiya klublari tashkilotlar tasarrufidagi barcha musobaqalarda ishtirok etmaydigan bo‘ldi. 

Eslatib o‘tamiz, oktyabr oyida Rossiya terma jamoasi Kamerun (1:0) va Keniyaga (2:2) qarshi o‘rtoqlik o‘yinlari o‘tkazdi.