Россия футбол иттифоқи бир қанча Африка терма жамоалари билан ўртоқлик ўйини ўтказиш бўйича музокаралар олиб бормоқда.
“Спорт-Экспресс” нашрининг хабарига кўра, РФИ Сенегал билан музокара ўтказмоқда. Манбанинг маълум қилишича, терма жамоалар ноябрь ойидаги халқаро танаффусда ўзаро ўйин ўтказиш эҳтимоли кичик, аммо 2024 йилда бу учрашув бўлиб ўтади.
Шунингдек, РФИ Занзибар билан ҳам музокара олиб бормоқда. Занзибар ФИФА аъзолигига кирмайди, Танзания республикаси таркибида автоном ҳисобланади. Шу сабабли Танзания терма жамоаси аъзолари Занзибар сафида ўйнаши мумкин. Ундан ташқари Танзания терма жамоасининг ўзи ҳам Россия билан ўртоқлик ўйини ўтказишга қизиқиш билдирмоқда.
Судан ва Сейшел ороллари ҳам 2024 йилда Россия терма жамоаси билан ўртоқлик ўйинида иштирок этиши мумкин, дея хабар беради “Матч TV”.
Футбол бўйича СССР терма жамоасининг собиқ футболчиси Анзор Кавазашвили бундай вазиятда Россия терма жамоаси исталган жамоа билан ўйнаши шарт деб ҳисоблайди.
“Ҳозир рақиб танлайдиган вақт эмас: Занзибарми, Гвинеями, Чадми фарқи йўқ. Бу терма жамоалар Россия билан ўйнашга лойиқ эмас дейдиганлар адашмоқда”, — айтиб ўтди Кавазашвили.
ФИФА ва УЕФА 2022 йил баҳорида Россия терма жамоасини четлатганди, шунингдек, Россия клублари ташкилотлар тасарруфидаги барча мусобақаларда иштирок этмайдиган бўлди.
Эслатиб ўтамиз, октябрь ойида Россия терма жамоаси Камерун (1:0) ва Кенияга (2:2) қарши ўртоқлик ўйинлари ўтказди.
Изоҳ (0)