Qonunchilik palatasidagi O‘zbekiston Ekologik partiyasi fraksiyasining yig‘ilishida “O‘zbekiston Respublikasining ayrim qonun hujjatlariga saylov va referendum o‘tkazish tartibini yanada takomillashtirishga qaratilgan o‘zgartirish va qo‘shimchalar kiritish to‘g‘risida”gi qonun loyihasi ikkinchi o‘qishga ko‘rib chiqildi.
Keng jamoatchilik muhokamasiga qo‘yilgan mazkur loyiha Qonunchilik palatasiga saylovni aralash saylov tizimi, yaʼni majoritar-proporsional shaklda o‘tkazishni nazarda tutadi.
Qayd etilishicha, Konstitutsiyaviy qonun loyihasida bir qator yangiliklar joriy etilmoqda. Masalan, yagona saylov okrugi bo‘yicha ovoz berishda ishtirok etgan saylovchilarning kamida 7 foiz ovozini olgan partiya belgilangan tartibda deputatlik o‘rinlariga ega bo‘lishi belgilanmoqda. Agar hech qaysi partiya kamida yetti foiz ovozni to‘plamagan bo‘lsa, saylov o‘tmagan, deb topilishi nazarda tutilyapti.
Muhokamalarda fraksiya aʼzolari mazkur Konstitutsiyaviy qonun loyihasining mohiyati va ahamiyati xususida o‘z fikr-mulohazalarini bildirgan.
Avvalroq “O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida”gi qonun loyihasi bilan 100 ming nafardan kam bo‘lmagan fuqarolar tomonidan qonunchilik takliflarini ilgari surish va Oliy Majlis Qonunchilik palatasiga kiritish imkoniyati taqdim etilishi to‘g‘risida xabar berilgandi.
Izoh (0)