“Dendropark”da daraxtlar kesilib, noqonuniy qurilishlar qilingani yuzasidan jinoyat ishi qo‘zg‘atildi

Toshkent viloyati Toshkent tumanida joylashgan manzarali bog‘dorchilik va o‘rmon ilmiy-tajriba xo‘jaligi (xalq tilidagi “Dendropark”) hududida yashillik darajasi qisqarayotgani aniqlangandi. Bosh prokuratura matbuot xizmati holat yuzasidan jinoyat ishi qo‘zg‘atilganini ma’lum qildi.

Tegishli idoralar bilan hamkorlikda “Dendropark” hududidagi o‘simliklar dunyosi ahvoli aerokosmik tahlil asosida o‘rganilgandi. O‘rganishda Toshkent viloyati Toshkent tumanida joylashgan “Darxon” ilmiy-tajriba stansiyasi (“Dendropark”) yer maydonlari mutaxassislar ishtirokida ko‘zdan kechirilib, daraxtlarni nobud qilish, yer ajratish va undan foydalanish qoidalarini buzish bilan bog‘liq ko‘plab holatlar aniqlangan.

Xususan, hududda turli fuqarolar va xo‘jalik yurituvchi subyektlar tomonidan manzarali bog‘dorchilik va o‘rmon sohasiga aloqasi bo‘lmagan xo‘jalik faoliyati olib borilayotgani aniqlangan, ko‘plab kapital qurilishlar amalga oshirilgan. Daraxtlarning parvarishiga mas’uliyatsizlik bilan yondashilgani oqibatida 103 tup yong‘oq daraxti qurib qolgan, 85 tup ko‘p yillik yong‘oq daraxti kesilib, ildizi bilan qo‘porib olingan.

Mazkur holatlar yuzasidan Jinoyat kodeksining 198 (ekinzorlarni, o‘rmonlarni, daraxtlarni yoki boshqa o‘simliklarni shikastlantirish yoxud nobud qilish) va 205 (hokimiyat yoki mansab vakolatini suiiste’mol qilish) moddalari bilan jinoyat ishi qo‘zg‘atildi.

Tergov harakatlari o‘tkazilmoqda.