Qashqadaryo viloyatining Nishon tumanida yashovchi fuqaro ichimlik suvidan noqonuniy foydalanib, dehqon xo‘jaligini sug‘orib kelgani va “Qashqadaryo suv ta’minoti” MCHJ manfaatlariga katta zarar yetkazgani uchun 3 yilga ozodlikdan mahrum qilindi. Bu haqda “Daryo”ga “Qashqadaryo suv ta’minoti” MCHJ axborot xizmati rahbari Ixtiyor Umarov xabar berdi.
Ma’lum bo‘lishicha, Jinoyat ishlari bo‘yicha Nishon tuman sudida shu tumanning Balxiyak qishlog‘ida yashovchi O‘.A.ga nisbatan qo‘zg‘atilgan jinoyat ishi ko‘rib chiqilgan.
Aniqlanishicha, 2010-yilda dehqon xo‘jaligi tashkil etgan fuqaro “Talimarjon—Muborak” magistral quvuriga (D-76 mm quvur) noqonuniy ulanib, ichimlik suvidan ekinlarni sug‘orib kelgan.
“Qashqadaryo suv ta’minoti” MCHJ xodimlari tomonidan o‘tkazilgan reyd tadbirlari davomida uning bu qilmishi fosh bo‘lib, jamiyatga 282 million 716 ming 280 so‘m zarar yetkazgani aniqlangan.
Sud to‘plangan hujjatlar va tomonlarning ko‘rsatmalarini o‘rganib, O‘.A.ga 3 yil muddatga ozodlikdan mahrum qilish jazosini tayinladi va sudlanuvchi sud zalidan qamoqqa olindi. Shuningdek, undan 282 million 716 ming 280 so‘m zarar undiriladigan bo‘ldi.
Izoh (0)