Toshkent viloyatining Olmaliq shahridagi “Ramazon” (xalq tilida “Selina”) mahallasidagi xonadonlarga ichimlik suvi qon aralash kelayotgani aytilgan video tarqaldi.
Bizning kranimizdan qon oqyapti. Bunga qaraydigan, javob beradigan bormi? Necha marotaba murojaat qilganmiz, suvimizga truba yorilishi oqibatida kushxonaning hamma qonlari oqib kelib, qo‘shilib ketadi. Biz shuni har doim ichib, kasal bo‘lyapmiz. Mahalla raisi, kim javob beradi bunga? Tegishli joyga ayting, bo‘lmasa tepaga chiqamiz biz. Ko‘ryapsiz, qon oqyapti, hidi sassiq. Bolalar ichib, hamma kasal bo‘lyapti, — deydi video muallifi MFY raisiga murojaat qilar ekan.
Shahar hokimligi mazkur holat mas’ullar e’tiboriga olinganini, muammo bartaraf etilayotganini bildirdi.
![](/static/Otabek/photo_2023-10-10_15-26-30.jpg)
Kuni kecha Olmaliq shahrining “Ramazon” mahallasidagi bir necha xonadondagi ichimlik suvi jo‘mraklaridan qonli suv oqishi kuzatilgan. Shahar “Suv ta’minoti” korxonasi mas’ullarining holat yuzasidan dastlabki ma’lumotiga ko‘ra, bu kushxonadagi oqova suv va ichimlik suv quvurining teshilib, o‘zaro qo‘shilib ketishi sababli kuzatilgan. Holat zudlik bilan mas’ullar tomonidan nazoratga olinib, hozirda ta’mirlash-tiklash ishlari olib borilmoqda, — deyiladi Olmaliq shahar hokimligi axborot xizmati tarqatgan xabarda.
“Daryo”ning bu haqdagi so‘roviga javob bergan “Toshkent suv ta’minoti” MCHJ axborot xizmati rahbari Akbar Tohirov muammo yuzaga kelganini tasdiqladi.
15 ta xonadon vaqtida imkoniyatidan kelib chiqib, quvur tortgan va xonadonlariga ichimlik suvini olib borgan. O‘tgan vaqt davomida quvur chirib, teshilgan va kushxonadan chiqqan suvlar bilan aralashib, shunday holat yuzaga kelgan. Ayni paytda muammo bartaraf etilmoqda. Ichimlik suvi quvuri yangilanmoqda, — deydi mas’ul.
Qo‘shimcha qilinishicha, voqea joyiga sanitariya-epidemiologik osoyishtalik va jamoat salomatligi xizmati vakillari ham yetib borib, vaziyatni o‘rganmoqda.
Izoh (0)