Afg‘onistonda yuz bergan zilzilalardan zarar ko‘rgan hududlarni tiklash uchun 93 million dollar kerak bo‘ladi, deb xabar bermoqda BMT axborot markazi.
Donorlar va jamg‘armalar mos ravishda 15,5 million va 10 million dollar berishga rozi bo‘lgan.
7 va 11-oktyabr kunlari Afg‘oniston g‘arbida sodir bo‘lgan zilzilalar oqibatida, mahalliy hukumat ma’lumotlariga ko‘ra, 2,4 mingdan ortiq odam halok bo‘lgan, 2 mingga yaqin kishi jarohat olgan.
Zilziladan u yoki bu darajada 43 mingdan ortiq odam jabr ko‘rdi, 3 330 dan ortiq uy vayron bo‘ldi. Eng ko‘p zarar ko‘rgan hudud Hirot viloyatining Injil tumanidir. U yerda jabrlanganlarning 23 mingga yaqini yashaydi (53 foizi).
BMTning Afg‘onistondagi gumanitar masalalar bo‘yicha koordinatori vazifasini bajaruvchi Daniel Endres suv ta’minoti tizimlari va quduqlarga jiddiy zarar yetganini ma’lum qildi.
Endresning aytishicha, vayron bo‘lgan inshootlardan katta miqdorda chiqindi to‘planishi suvning ifloslanishiga va kasalliklarning tarqalishiga olib kelishi mumkin. Mamlakatda havo salqinlashganiga qaramay, odamlar binolar qulab tushishidan qo‘rqib, ko‘chalarda uxlayapti, deya qo‘shimcha qildi BMT vakili.
7-oktyabr kuni Afg‘oniston g‘arbida 6,3 magnitudali ikkita zilzila sodir bo‘ldi. Birinchi kungi zilzilalardan Hirot viloyatining to‘rtta qishlog‘i asosiy zarar ko‘rdi. 11-oktyabr kuni mamlakatda yana 6,3 magnitudali zilzila qayd etildi.
O‘zbekiston, Qozog‘iston va Turkmaniston Afg‘onistonning zilziladan jabr ko‘rgan hududlariga insonparvarlik yordami jo‘natdi. O‘zbekiston 100 tonna gumanitar yordam jo‘natdi. Qozog‘iston salkam 1 700 tonna oziq-ovqat, chodir, ko‘rpa-to‘shak va kiyim-kechak sovg‘a qildi. Turkmaniston hukumati birinchi navbatda afg‘on bolalari uchun dori-darmon va birinchi tibbiy yordam vositalari, to‘qimachilik mahsulotlari va oziq-ovqatdan iborat insonparvarlik yordami yuborilgani haqida xabar berdi. Bundan tashqari, Tojikiston hukumati jabrlangan afg‘onlarga insonparvarlik yordami jo‘natish niyatida ekanini ma’lum qilgan.
Izoh (0)