Афғонистонда юз берган зилзилалардан зарар кўрган ҳудудларни тиклаш учун 93 миллион доллар керак бўлади, деб хабар бермоқда БМТ ахборот маркази.
Донорлар ва жамғармалар мос равишда 15,5 миллион ва 10 миллион доллар беришга рози бўлган.
7 ва 11 октябрь кунлари Афғонистон ғарбида содир бўлган зилзилалар оқибатида, маҳаллий ҳукумат маълумотларига кўра, 2,4 мингдан ортиқ одам ҳалок бўлган, 2 мингга яқин киши жароҳат олган.
Зилзиладан у ёки бу даражада 43 мингдан ортиқ одам жабр кўрди, 3 330 дан ортиқ уй вайрон бўлди. Энг кўп зарар кўрган ҳудуд Ҳирот вилоятининг Инжил туманидир. У ерда жабрланганларнинг 23 мингга яқини яшайди (53 фоизи).
БМТнинг Афғонистондаги гуманитар масалалар бўйича координатори вазифасини бажарувчи Даниэль Эндрес сув таъминоти тизимлари ва қудуқларга жиддий зарар етганини маълум қилди.
Эндреснинг айтишича, вайрон бўлган иншоотлардан катта миқдорда чиқинди тўпланиши сувнинг ифлосланишига ва касалликларнинг тарқалишига олиб келиши мумкин. Мамлакатда ҳаво салқинлашганига қарамай, одамлар бинолар қулаб тушишидан қўрқиб, кўчаларда ухлаяпти, дея қўшимча қилди БМТ вакили.
7 октябрь куни Афғонистон ғарбида 6,3 магнитудали иккита зилзила содир бўлди. Биринчи кунги зилзилалардан Ҳирот вилоятининг тўртта қишлоғи асосий зарар кўрди. 11 октябрь куни мамлакатда яна 6,3 магнитудали зилзила қайд этилди.
Ўзбекистон, Қозоғистон ва Туркманистон Афғонистоннинг зилзиладан жабр кўрган ҳудудларига инсонпарварлик ёрдами жўнатди. Ўзбекистон 100 тонна гуманитар ёрдам жўнатди. Қозоғистон салкам 1 700 тонна озиқ-овқат, чодир, кўрпа-тўшак ва кийим-кечак совға қилди. Туркманистон ҳукумати биринчи навбатда афғон болалари учун дори-дармон ва биринчи тиббий ёрдам воситалари, тўқимачилик маҳсулотлари ва озиқ-овқатдан иборат инсонпарварлик ёрдами юборилгани ҳақида хабар берди. Бундан ташқари, Тожикистон ҳукумати жабрланган афғонларга инсонпарварлик ёрдами жўнатиш ниятида эканини маълум қилган.
Изоҳ (0)