Davlat xavfsizlik xizmati xodimlari tomonidan Toshkent viloyatida Soliq inspeksiyasi, Qoraqalpog‘istonda esa Davlat mehnat nazorati inspeksiyasi xodimlarini pora olayotganida ushlandi, deb xabar beradi O‘zA.
Qayd etilishicha, Toshkent viloyati Yangiyo‘l tuman Soliq inspeksiyasi katta inspektori hamda Yangiyo‘l shahar Soliq inspeksiyasi sho‘ba boshlig‘i o‘zaro til biriktirib, tadbirkorlik subyekti faoliyatida aniqlangan soliq qarzdorligini uning foydasiga hal qilib berish evaziga 5 ming dollar talab qilgan.
DXX tomonidan o‘tkazilgan tezkor tadbirda Soliq inspeksiyasi katta inspektori so‘ralgan pul mablag‘idan 4,5 ming dollarni olgan vaqtida ashyoviy dalillar bilan ushlangan.
DXX tomonidan hamkorlikda o‘tkazilgan tezkor tadbirda esa Qoraqalpog‘iston Respublikasi Kambag‘allikni qisqartirish va bandlik vazirligining Davlat mehnat nazorati inspeksiyasi xodimi qizilmiya ildizini qayta ishlashga ixtisoslashgan xususiy korxonada sodir bo‘lgan yong‘in oqibatida vafot etgan ikki nafar ishchining shartnoma asosida qonuniy ishlagani haqida xulosa berish evaziga 10 ming dollar olgan vaqtida ushlangan.
Hozirda holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilgan.
Avvalroq Farg‘onada savdo do‘koni yonidan bo‘sh yer olib berish uchun 8 ming dollar so‘ragan shaxs ushlangani, Andijonda 5 mlrd so‘m imtiyozli kredit olib berish uchun 22 ming dollar olgan shaxslar qo‘lga olingani, Samarqandda 10 ming dollarga fuqaroni qamoqdan chiqarib berishni va’da qilgan shaxs ushlangani to‘g‘risida xabar berilgandi.
Izoh (0)