Argentinaning Kordova provinsiyasida qahva tayyorlamoqchi bo‘lgan erkak kutilmaganda yirik o‘rmon yong‘inlariga sabab bo‘ldi.
11-oktyabr kuni The Telegraph nashri xabar berishicha, Argentinaning markaziy qismidagi Kordova provinsiyasida yirik o‘rmon yong‘ini sodir bo‘lgan. Olov o‘nlab uylarni vayron qildi, ko‘plab chorva mollari nobud bo‘ldi, 600 dan ortiq oila evakuatsiya qilindi. Hozirda mingga yaqin o‘t o‘chiruvchilar va ko‘ngillilar, shuningdek, sakkizta samolyot va ikkita vertolyot tabiiy ofatga qarshi kurashmoqda.
56 ming kishi istiqomat qiluvchi Vilya-Karlos-Pas kurort shaharchasida olov tunda turar joylarga yetib bordi. Odamlar suzish havzalaridagi suv bilan yong‘inni o‘chirishga kirishdi, kamida o‘nlab uylar yonib ketdi. Mahalliy hokimiyat 300 ta oilani tabiiy ofat hududidan majburan evakuatsiya qildi, yana shuncha oila esa o‘zini o‘zi evakuatsiya qildi. Shaharda qolgan odamlar havodagi quyuq tutun tufayli nafas olishga qiynalmoqda. Yong‘indan jabr ko‘rgan yana bir shahar Kabalangoda sohilbo‘yi hududlari yonib ketdi, mahalliy hukumat buni “haqiqiy ofat” deb atadi.
“Aholini yong‘in sodir bo‘lgan hududlarda ishlayotgan o‘t o‘chiruvchilar va mutasaddilarning ko‘rsatmalariga rioya qilishga chaqiraman. Eng muhimi — odamlar hayotini saqlab qolish, agar evakuatsiya zarur bo‘lsa, biz buni amalga oshiramiz”, — deb va’da berdi Kordova gubernatori.
Yong‘in sababchisi sifatida 27 yoshli erkak qo‘lga olindi. U politsiyaga qahva tayyorlash uchun ochiq havoda olov yoqqanini, ammo kuchli shamol tufayli “olov nazoratdan chiqib ketgan”ini aytgan.
Hududda yong‘in davom etmoqda. Mahalliy favqulodda xizmatlar vaziyatni o‘ta og‘ir deb baholamoqda, chunki ob-havo sharoiti yong‘inni o‘chirishni qiyinlashtirmoqda — Argentinada bir necha kundan beri kuchli jazirama kuzatilmoqda, shamol tezligi 35 km/soatga yetadi. Mamlakat tarixdagi eng dahshatli qurg‘oqchilikni ham boshdan kechirmoqda.
Izoh (0)