Аргентинанинг Кордова провинциясида қаҳва тайёрламоқчи бўлган эркак кутилмаганда йирик ўрмон ёнғинларига сабаб бўлди.
11-октябр куни The Telegraph нашри хабар беришича, Аргентинанинг марказий қисмидаги Кордова провинциясида йирик ўрмон ёнғини содир бўлган. Олов ўнлаб уйларни вайрон қилди, кўплаб чорва моллари нобуд бўлди, 600 дан ортиқ оила эвакуация қилинди. Ҳозирда мингга яқин ўт ўчирувчилар ва кўнгиллилар, шунингдек, саккизта самолёт ва иккита вертолёт табиий офатга қарши курашмоқда.
56 минг киши истиқомат қилувчи Виля-Карлос-Пас курорт шаҳарчасида олов тунда турар жойларга етиб борди. Одамлар сузиш ҳавзаларидаги сув билан ёнғинни ўчиришга киришди, камида ўнлаб уйлар ёниб кетди. Маҳаллий ҳокимият 300 та оилани табиий офат ҳудудидан мажбуран эвакуация қилди, яна шунча оила эса ўзини ўзи эвакуация қилди. Шаҳарда қолган одамлар ҳаводаги қуюқ тутун туфайли нафас олишга қийналмоқда. Ёнғиндан жабр кўрган яна бир шаҳар Кабалангода соҳилбўйи ҳудудлари ёниб кетди, маҳаллий ҳукумат буни “ҳақиқий офат” деб атади.
“Аҳолини ёнғин содир бўлган ҳудудларда ишлаётган ўт ўчирувчилар ва мутасаддиларнинг кўрсатмаларига риоя қилишга чақираман. Энг муҳими — одамлар ҳаётини сақлаб қолиш, агар эвакуация зарур бўлса, биз буни амалга оширамиз”, — деб ваъда берди Кордова губернатори.
Ёнғин сабабчиси сифатида 27 ёшли эркак қўлга олинди. У полицияга қаҳва тайёрлаш учун очиқ ҳавода олов ёққанини, аммо кучли шамол туфайли “олов назоратдан чиқиб кетган”ини айтган.
Ҳудудда ёнғин давом этмоқда. Маҳаллий фавқулодда хизматлар вазиятни ўта оғир деб баҳоламоқда, чунки об-ҳаво шароити ёнғинни ўчиришни қийинлаштирмоқда — Аргентинада бир неча кундан бери кучли жазирама кузатилмоқда, шамол тезлиги 35 км/соатга етади. Мамлакат тарихдаги энг даҳшатли қурғоқчиликни ҳам бошдан кечирмоқда.
Изоҳ (0)