G‘azoga berilgan zarba oqibatlari — sun’iy yo‘ldosh tasvirlarida (foto)

Maxar Technologies kompaniyasi sun’iy yo‘ldoshdan olingan suratlarda Isroilning G‘azo sektoriga bergan zarbalari oqibatlarini ko‘rsatdi.

7-oktyabr kuni HAMAS Isroil hududiga yirik raketa hujumi boshlab, mamlakatning G‘azo bilan chegara hududlariga kirib bordi, 100 dan ortiq odamlarni, jumladan xorijliklarni asirga oldi. Isroil HAMAS guruhining hujumiga javoban G‘azo sektorini bombardimon qilmoqda.

10-oktyabrga kelib, Isroil tomonida halok bo‘lganlar soni 1,2 ming kishidan oshdi, 3 mingga yaqin kishi jarohatlangan. G‘azo sektorida esa jami 950 kishi halok bo‘ldi, 5 mingga yaqin kishi jarohat oldi.

Shu kuni Isroil mudofaa vaziri Yoav Galant Isroil armiyasi “vaziyatni nazoratga olgani” va “to‘liq miqyosli hujumga o‘tayotganini” aytdi.

“HAMAS G‘azo sektorida o‘zgarish bo‘lishini xohladi va u jangarilar o‘ylaganidan 180 darajaga o‘zgaradi. Ular bu daqiqadan pushaymon bo‘lishadi. G‘azo hech qachon avvalgi holiga qaytmaydi. Kim bosh olishga, ayollarni va Holokostdan omon qolganlarni o‘ldirishga kelsa, biz uni yo‘q qilamiz”, — dedi Galant.

Falastin bosh vaziri Muhammad Shtaye HAMAS va Isroil o‘rtasidagi ziddiyatning kuchayishi sababli G‘azo sektori insonparvarlik falokatiga duch kelayotgani haqida ogohlantirdi.