Surxondaryo viloyatida aholi murojaatlariga e’tiborsiz qarab, mas’uliyatsizlik qilgan 14 nafar mas’ul vazifasidan olindi. Bu haqda viloyat rahbari Ulug‘bek Qosimov raisligidagi hokimlik soatida ma’lum qilingan.
Bugun viloyat hokimi Ulug‘bek Qosimov rahbarligida sektorlar, hokim o‘rinbosarlari, tashkilot va boshqarma rahbarlari hamda hududiy studiyalardan aloqador mas’ullar ishtirokida qator masalalar muhokamasiga bag‘ishlangan “Hokimlik soati” o‘tkazildi. Hokimlik soatida jurnalist, blogerlar hamda jamoatchilik faollari ham ishtirok etishdi.
Yig‘ilishda ijro intizomi, fuqarolar murojaatlari ijrosi, ijtimoiy soha obyektlarini kuz-qish mavsumiga tayyorlash, kommunal to‘lovlarni undirish masalalari hamda jurnalist va blogerlar tomonidan ko‘tarib chiqilayotgan joylardagi muammo va murojaatlar ijrosi tahlil qilindi. Har bir masala yuzasidan mas’ullar hamda hududlar rahbarlarining hisoboti tinglandi, — deyiladi hokimlik xabarida.
Aniqlik kiritilishicha, fuqarolar murojaatlari ijrosi hamda ko‘tarilayotgan muammoli masalalarni hal etishda sustkashlikka yo‘l qo‘yayotgan, yuklatilgan vazifalarga befarqlik bilan qaragan viloyat va hududiy darajadagi rahbarlar hamda mas’ullarning 14 nafarini egallab turgan vazifasidan ozod etish haqida qaror qabul qilingan.
Qolaversa 4 nafarini oylik ish haqidan jarimaga tortish, 8 nafariga “hayfsan” intizomiy jazosini qo‘llash belgilandi. Ayrim tuman hokimlari rasman ogohlantirildi, — deydi hokimlik axborot xizmati rahbari Murodbek Davlatov.
Hokimlik 14 nafar ishdan olingan mas’ullar va ogohlantirish olgan hokimlar kimlar ekaniga aniqlik kiritmagan.
Qo‘shimcha qilinishicha, viloyat rahbari kun tartibidagi har bir masala yuzasidan aniqlangan kamchiliklarni bartaraf etish, murojaatlar ijrosini qat’iy nazorat ostida bajarilishini ta’minlash, ijtimoiy soha obyektlarini kuz-qish mavsumiga tayyorlash, markazlashgan isitish tizimini joriy etish ishlarini bir hafta muddatda yakuniga yetkazish yuzasidan topshiriqlarni belgilab bergan.
Izoh (0)