Сурхондарё вилоятида аҳоли мурожаатларига эътиборсиз қараб, масъулиятсизлик қилган 14 нафар масъул вазифасидан олинди. Бу ҳақда вилоят раҳбари Улуғбек Қосимов раислигидаги ҳокимлик соатида маълум қилинган.
Бугун вилоят ҳокими Улуғбек Қосимов раҳбарлигида секторлар, ҳоким ўринбосарлари, ташкилот ва бошқарма раҳбарлари ҳамда ҳудудий студиялардан алоқадор масъуллар иштирокида қатор масалалар муҳокамасига бағишланган “Ҳокимлик соати” ўтказилди. Ҳокимлик соатида журналист, блогерлар ҳамда жамоатчилик фаоллари ҳам иштирок этишди.
Йиғилишда ижро интизоми, фуқаролар мурожаатлари ижроси, ижтимоий соҳа объектларини куз-қиш мавсумига тайёрлаш, коммунал тўловларни ундириш масалалари ҳамда журналист ва блогерлар томонидан кўтариб чиқилаётган жойлардаги муаммо ва мурожаатлар ижроси таҳлил қилинди. Ҳар бир масала юзасидан масъуллар ҳамда ҳудудлар раҳбарларининг ҳисоботи тингланди, — дейилади ҳокимлик хабарида.
Аниқлик киритилишича, фуқаролар мурожаатлари ижроси ҳамда кўтарилаётган муаммоли масалаларни ҳал этишда сусткашликка йўл қўяётган, юклатилган вазифаларга бефарқлик билан қараган вилоят ва ҳудудий даражадаги раҳбарлар ҳамда масъулларнинг 14 нафарини эгаллаб турган вазифасидан озод этиш ҳақида қарор қабул қилинган.
Қолаверса 4 нафарини ойлик иш ҳақидан жаримага тортиш, 8 нафарига “ҳайфсан” интизомий жазосини қўллаш белгиланди. Айрим туман ҳокимлари расман огоҳлантирилди, — дейди ҳокимлик ахборот хизмати раҳбари Муродбек Давлатов.
Ҳокимлик 14 нафар ишдан олинган масъуллар ва огоҳлантириш олган ҳокимлар кимлар эканига аниқлик киритмаган.
Қўшимча қилинишича, вилоят раҳбари кун тартибидаги ҳар бир масала юзасидан аниқланган камчиликларни бартараф этиш, мурожаатлар ижросини қатъий назорат остида бажарилишини таъминлаш, ижтимоий соҳа объектларини куз-қиш мавсумига тайёрлаш, марказлашган иситиш тизимини жорий этиш ишларини бир ҳафта муддатда якунига етказиш юзасидан топшириқларни белгилаб берган.
Изоҳ (0)