Surxondaryo viloyati paxtakorlari O‘zbekistonda birinchi bo‘lib, 2023-yilgi paxta topshirish shartnomaviy rejasini ortig‘i bilan bajardi.
Qayd etilishicha, viloyatdagi qabul punktlariga 268 ming tonnadan ziyod xomashyo topshirilgan. 2023-yilda viloyatda 12 ta paxtachilik–to‘qimachilik klasteri va 2 096 fermer xo‘jaligi 72 ming 270 gektar maydonda mahalliy iqlimga mos, ertapishar “Buxoro-102”, “Buxoro-108”, “Buxoro-110”, “Namangan-77”, “Sulton” kabi ertapishar va “Termiz-202”, “SP-1607”, “ST-1651” singari ingichka tolali g‘o‘za navlarini parvarishlagan.
Paxta yig‘im–terimini uyushqoqlik bilan amalga oshirish uchun 1 529 ta otryad tuzilib, 167 ming nafardan ziyod terimchi, 1 180 ta traktor va 1 983 ta tirkama jalb etilgan. Shartnomaviy reja 30 kunda ortig‘i bilan uddalangan.
Tadbirda ilg‘or sektorlar, klaster va fermer xo‘jaliklari rahbarlari, shuningdek, yig‘im-terim mavsumida faol ishtirok etgan mutasaddilarga viloyat hokimining faxriy yorliq va esdalik sovg‘alari topshirilgan.
Avvalroq Surxondaryo viloyatida paxta rejasini birinchilardan bo‘lib bajargan fermerga avtomobil sovg‘a qilingani to‘g‘risida xabar berilgandi.
Izoh (0)