Toshkent viloyati prokuraturasi hamda Toshkent viloyati Ekologiya boshqarmasi bilan hamkorlikda Yuqori Chirchiq tumanida ekologik nazorat tadbirlari o‘tkazildi.
Qayd etilishicha, tadbir davomida tumanning “Fayzobod” MFY hududida uch tup o‘sib turgan chinor daraxtlari kesilgani aniqlangan. Vazirlar Mahkamasining 2022-yil 22-avgustdagi “Davlat o‘rmon fondiga kirmaydigan daraxtlar va butalarni ekish, parvarish qilish va ulardan foydalanish tartibini yanada takomillashtirish to‘g‘risida”gi 464-sonli qaroriga asosan, tabiatga yetkazilgan zarar hisob-kitob qilinganda, 148 million 793 ming so‘mni tashkil qilgan.
Ushbu holat yuzasidan Toshkent viloyati prokuraturasi jinoyat ishi qo‘zg‘atib, hozirda tergov harakatlari olib borilmoqda.
O‘zbekistonda 2023-yilning o‘tgan davrida daraxtlarning noqonuniy kesilishi bilan bog‘liq 2 427 ta huquqbuzarlik qayd etilib, shundan 714 tup qimmatbaho navli daraxtlar noqonuniy kesilishiga yo‘l qo‘yilgani to‘g‘risida xabar berilgandi. Undan oldin esa Xorazmda o‘zini tadbirkor deb tanishtirgan shaxslar istirohat bog‘idagi daraxtlarni kesib tashlagandi.
Izoh (0)