Тошкент вилояти прокуратураси ҳамда Тошкент вилояти Экология бошқармаси билан ҳамкорликда Юқори Чирчиқ туманида экологик назорат тадбирлари ўтказилди.
Қайд этилишича, тадбир давомида туманнинг “Файзобод” МФЙ ҳудудида уч туп ўсиб турган чинор дарахтлари кесилгани аниқланган. Вазирлар Маҳкамасининг 2022 йил 22 августдаги “Давлат ўрмон фондига кирмайдиган дарахтлар ва буталарни экиш, парвариш қилиш ва улардан фойдаланиш тартибини янада такомиллаштириш тўғрисида”ги 464-сонли қарорига асосан, табиатга етказилган зарар ҳисоб-китоб қилинганда, 148 миллион 793 минг сўмни ташкил қилган.
Ушбу ҳолат юзасидан Тошкент вилояти прокуратураси жиноят иши қўзғатиб, ҳозирда тергов ҳаракатлари олиб борилмоқда.
Ўзбекистонда 2023 йилнинг ўтган даврида дарахтларнинг ноқонуний кесилиши билан боғлиқ 2 427 та ҳуқуқбузарлик қайд этилиб, шундан 714 туп қимматбаҳо навли дарахтлар ноқонуний кесилишига йўл қўйилгани тўғрисида хабар берилганди. Ундан олдин эса Хоразмда ўзини тадбиркор деб таништирган шахслар истироҳат боғидаги дарахтларни кесиб ташлаганди.
Изоҳ (0)