O‘zbekiston Ekologik partiyasi Xorazm viloyatining Shovot tumanidagi Komiljon Otaniyozov nomli dam olish va istirohat bog‘ida manzarali daraxtlar kesilganini ma’lum qildi.
Ijtimoiy tarmoqlarda Shovot shaharchasidagi K.Otaniyozov nomli dam olish va istirohat bog‘ida qurimagan daraxtlarni kesib tashlashmoqda” degan mazmunda videoxabar tarqaldi. Ushbu holat bo‘yicha O‘zbekiston Ekologik partiyasi Xorazm viloyati va tuman partiya tashkiloti xodimlari, tuman Ekologiya, atrof muhitni muhofaza qilish va iqlim o‘zgarishi bo‘limi vakillari, bog‘ mas’ullari ishtirokida o‘rganish ishlari olib borilgan.
Aniqlanishicha, haqiqatdan ham noma’lum shaxslar tomonidan 9-iyul kuni tungi paytda bog‘da o‘zlarini tadbirkor, deb atagan shaxslar tomonidan bir nechta daraxtlar kesilgan. Mahalla fuqarolari tomonidan jamoatchilik asosida o‘tkazgan nazorat davomida mazkur shaxslar harakati to‘xtatilib, so‘ralganda tuman hokimi tomonidan og‘zaki ruxsat berilgani aytilgan.
Ma’lum bo‘lishicha, hech bir tadbirkorga bog‘ hududidan yer ajratilmagan.
O‘zbekiston Ekologik partiyasi bunday salbiy holatlarni keskin qoralagan holda noqonuniy daraxt kesganlarga nisbatan qat’iy chora ko‘rilishini so‘raydi.
Mazkur istirohat bog‘idagi qurilish ishlari xalq deputatlari Shovot tuman kengashining 2023-yil 21-fevraldagi qarori bilan boshlangan. Qaror ilovasining 10-bandida Komiljon Otaniyozov nomli istirohat bog‘ida yil davomida 14 ta attraksion o‘rnatish hamda 10 ta ko‘chma savdo shoxobchalarini joylashtirish uchun yer maydonini auksionga chiqarish belgilangan.
Xorazm viloyati Ekologiya boshqarmasi holat yuzasidan dastlabki o‘rganish boshlanganini, o‘rganish natijasi yuzasidan qo‘shimcha maʼlumot berilishini bildirdi.
Noqonuniy daraxt kesish holatlari
Bir necha kun oldin Farg‘onadagi chegara posti yaqinida 12 tup manzarali daraxt qo‘porib tashlangani to‘g‘risida xabar berilgandi. O‘zbekistonda 2022-yil davomida daraxt va butalarning noqonuniy kesilishi ortidan tabiatga 10 milliard so‘m zarar yetkazilgan. O‘tgan yilda jami 1 777 tup qimmatbaho va ko‘p yillik daraxtlar kesilgan. Vaziyat tahlil etilganda, qurilish obyektlari atrofini o‘rab olish natijasida daraxtlarning qarovsiz qolishi, shikastlanishi va nobud bo‘lish holatlari sodir etilayotgani aniqlangan.
Izoh (0)