Бишкекнинг Первомайский туман суди чеченистонлик фаол Мансур Мовлаевни Қирғизистон чегарасини ноқонуний кесиб ўтгани учун олти ойга озодликдан маҳрум этиш, сўнг депортация қилиш ҳақида ҳукм чиқарди.
Мансур Мовлаев Қирғизистон Республикаси Жиноят кодексининг “Чегарани ноқонуний кесиб ўтиш” бандида назарда тутилган жиноятни содир этганликда айбдор деб топилди, деб хабар бермоқда “24.кг”.
Унга олти ойга умумий режимдаги ахлоқ тузатиш колониясида жазо тайинланди. Ҳукмнинг бошланиши 20 августдан ҳисобланади. Ҳукм қонуний кучга кирган ва жазо ўталганидан кейин суд уни мамлакатдан чиқариб юборади.
Мансур Мовлаевнинг адвокати Бактибек Автандилнинг сўзларига кўра, ҳимоячи Чеченистон хавфсизлик кучлари томонидан қийноқларга дучор бўлишдан қўрқиб, унга реал муддат тайинлашни талаб қилган.
Мансур Мовлаев бир неча бор Чеченистонда инсон ҳуқуқлари бузилиши ва сиёсий репрессияларга қарши чиққан. У республика раҳбари Рамзан Қодировни танқид қилган. 2020 йилда у уч йиллик қамоқ жазосига ҳукм қилинди. 2022 йилда Мовлаев шартли равишда озодликка чиқарилган, бироқ у Чеченистоннинг Шалинский тумани ички ишлар бошқармаси ходимлари томонидан ҳибсга олинган. Мовлаев Россиядан қочишга муваффақ бўлган ва федерал қидирувга берилган.
Мовлаев 2022 йилдан бери Қирғизистонда бўлиб турибди.
Изоҳ (0)