Checheniston hukumatini tanqid qilib tanilgan bloger Tumso Abdurahmonov Shvetsiyada o‘ldirildi, deya xabar bermoqda Chechenistonning muxolifatchi Telegram-kanali 1ADAT Yevropa va chechenistonlik informatorlariga tayanib.
“Tumso tunda bir guruh shaxslar tomonidan otib tashlangan, ayni paytda esa qotillik tafsilotlari aniqlashtirilmoqda”, — deyiladi 1ADAT xabarida. Boshqa tafsilotlar keltirilmagan, biroq qayd etilishicha, maxsus xizmatlar Tumso Abdurahmonovning ukasini yashirib qo‘ygan.
“Radio Svoboda” xabariga ko‘ra, Abdurahmonovning safdoshlari ma’lum qilishicha, u 2-dekabrga o‘tar kechasi o‘ldirilgan. Shvetsiya huquq-tartibot organlari izoh berganicha yo‘q.
Dekabrning ilk sanalarida Tumso Abdurahmonov aloqaga chiqmay qo‘ygan. Huquq himoyachilari uning g‘oyib bo‘lganini ma’lum qilgan. O‘sha paytdayoq bloger o‘ldirilgan bo‘lishi mumkinligi haqida xabarlar paydo bo‘lgandi, ammo ular tasdiqlanmagandi.
Tumso Abdurahmonov Checheniston hukumatiga nisbatan tanqidlari bilan mashhur bo‘lgan. 2015-yilda u Checheniston rahbari Ramzan Qodirovning qarindoshlari bilan nizo yuzaga kelganidan keyin Rossiyani tark etgandi. Shvetsiyada u siyosiy qochqin maqomini qo‘lga kiritgan. Chechenistonda Abdurahmonov ISHID bilan aloqalarda ayblanmoqda. 2020 va 2021-yillarda Abdurahmonov va uning ukasi Muhammadga suiqasdlar uyushtirilgandi. 2021-yil dekabrida Tumso Abdurahmonov Chechenistonda uning to‘qqiz nafar qarindoshi qo‘lga olinganini ma’lum qilgandi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)