4-oktyabrga o‘tar kechasi Rossiyaning Belgorod, Bryansk va Kursk viloyatlarida Ukrainaning samolyot tipidagi 31 ta droni urib tushirildi, deb xabar bermoqda Rossiya Mudofaa vazirligi.
Vazirlik hujumning boshqa tafsilotlarini keltirmadi.
Belgorod viloyati gubernatori Vyacheslav Gladkovning so‘zlariga ko‘ra, havo hujumidan mudofaa kuchlari Belgorod shahri, Belgorod va Korochanskiy tumanlari ustida 19 ta “obyekt”ni urib tushirgan. Dastlabki ma’lumotlarga ko‘ra, hujum oqibatida Belgorod shahridagi ma’muriy bino, Belgorod tumani Shishino qishlog‘idagi uy va 3 ta avtomobil zarar ko‘rgan. Gladkov qurbonlar bor-yo‘qligiga aniqlik kiritmadi.
Bryansk viloyati gubernatori Aleksandr Bogomaz ham tungi dron hujumi haqida xabar berdi. Uning so‘zlariga ko‘ra, viloyat hududida bitta uchuvchisiz uchoq urib tushirilgan. Jarohatlanganlar va vayronalar yo‘q.
Kursk viloyati rasmiylari Mudofaa vazirligining urib tushirilgan dronlar haqidagi bayonotiga hozircha izoh bermadi.
Shuningdek, Rossiya Mudofaa vazirligi matbuot xizmati Qora dengizning shimoli-g‘arbiy qismida Rossiya harbiy samolyotlari “Ukraina Qurolli Kuchlari desant guruhining Qrim hududiga kirishga urinishini to‘xtatganini” xabar qildi.
Avvalroq Rossiya Tergov qo‘mitasi Ukrainaning to‘rt nafar harbiy rahbari, jumladan Ukraina Mudofaa vazirligining Bosh razvedka boshqarmasi boshlig‘i Kirill Budanovni dronlar hujumi bilan Rossiyada terrorchilik harakatlarini sodir etganlikda sirtdan ayblagandi.
Rossiyaning Ukrainaga bosqini boshlanganidan beri Rossiya hududlari, ayniqsa chegara viloyatlari o‘qqa tutildi va dronlar hujumiga uchradi. Eng yirik dron hujumlaridan biri 30-avgustga o‘tar kechasi sodir bo‘ldi. O‘shanda Rossiya Mudofaa vazirligi va mintaqaviy hokimiyatlar havo hujumidan mudofaa tizimlari Bryansk, Ryazan, Oryol, Kaluga, Pskov va Moskva viloyatlarida, shuningdek, anneksiya qilingan Sevastopolda dronlarni urib tushirganini ma’lum qildi.
Izoh (0)