Yevropa Ittifoqi Ukraina bilan uning ittifoqqa kirishi bo‘yicha muzokaralar boshlangani haqida dekabr oyida rasman e’lon qilmoqchi, deb xabar berdi Politico uch yevropalik diplomatga tayanib.
Noyabr oyida Yevrokomissiya Ukraina YIga kirish uchun zarur shartlarni qay darajada bajarayotgani haqida oraliq hisobot e’lon qiladi. Uning ortida Komissiya bayonoti beriladi, shundan so‘ng Yevropa Ittifoqiga a’zo davlatlar uchun “qani, muzokaralarni boshlaymiz demaslik juda qiyin bo‘ladi”, dedi nashr manbalaridan biri.
“Siyosiy bosim ancha kuchli bo‘lishi aniq, chunki muayyan davlatlar qarshilik ko‘rsatadi. Ishchi taxmin chindan ham shunday: dekabr oyiga qadar Yevropa Kengashi muzokaralarni boshlashga qaror qiladi”, — dedi ismi sir qolishini istagan manba.
Yevropa Ittifoqiga aʼzolik bo‘yicha muzokaralarni boshlash uchun Kiyev Yevropa komissiyasi qo‘ygan yetti shartni bajarishi kerak. Ukraina hukumati ulardan faqat ikkitasini — sud-huquq islohoti va ommaviy axborot vositalari to‘g‘risidagi qonun bilan bog‘liq shartlarni bajarganini ma’lum qilgan.
Politico manbalarining qayd etishicha, Yevropa Ittifoqi yetakchilari huquqiy asos bo‘yicha kelishilmagan holda muzokaralar o‘tkazishga ruxsat beruvchi siyosiy bayonot chiqaradi. Suhbatdoshlardan biri Kiyevning Yevropa Ittifoqiga kirish yo‘lida muvaffaqiyat ko‘rsatayotganini, haligacha muammoli ko‘rinayotgan yagona masala Ukrainadagi ozchiliklarning ahvoli bilan bog‘liqligini ta’kidladi.
Ukraina Rossiyaning keng ko‘lamli bosqini boshlanganidan so‘ng darhol Yevropa Ittifoqiga a’zo bo‘lish uchun ariza berdi. Bir oy ichida rasmiylar ikki mingdan ortiq savollarni o‘z ichiga olgan YI maxsus anketasini to‘ldirdi. 2022-yil 23-iyun kuni Yevropa Ittifoqi yetakchilarining sammitida Ukraina va Moldova uchun Yevropa Ittifoqiga nomzodlik maqomi kelishib olindi. Turli hisob-kitoblarga ko‘ra, Ukrainaga to‘liq Yevropa integratsiyasi uchun 10 yildan 20 yilgacha vaqt kerak bo‘lishi mumkin.
Izoh (0)