Қозоғистон Ташқи ишлар вазирлиги расмий вакили Айбек Смадияров республика расмийлари мамлакат ҳақида салбий гапирадиган хорижликлар реестрини юритишини маълум қилди. Бу ҳақда Tengrinews хабар берди.

“Табиийки, биз ушбу рўйхатни юритмоқдамиз. Аммо бу ишчи рўйхат ва уни ошкор қилмаймиз. Рақамни ҳам айта олмайман”, — деди Смадияров матбуот брифингида. 

Шунингдек, у рўйхатдаги шахсларга мамлакатга кириш тақиқланишини қўшимча қилди. 

2022 йил июнь ойида Қозоғистон телеграф агентлиги россиялик телебошловчи Тигран Кеосаян Қозоғистонга кириши тақиқланганлар рўйхатига киритилгани ҳақида хабар берганди. 

“Чегарада дарҳол унга ‘қизил байроқлар’ қўйилди. Кеосаяндан ташқари бу рўйхатга Қозоғистонда тақиқланган террорчилар ва бошқа исталмаган шахслар ҳам киритилган”, — деди агентлик манбаси.

Кейинроқ Қозоғистон Ташқи ишлар вазирлиги вакили Айбек Смадияров расмийлар Кеосаяннинг мамлакатга киришини тақиқлаш ниятида эканини тасдиқлади. Шу билан бирга, Смадияров кириши тақиқланган шахслар рўйхати телебошловчи билан содир бўлган воқеадан олдин пайдо бўлганини таъкидлади.