Davolash-profilaktika muassasalarining 33 foiziga ichimlik suvi tashib kelinadi. Bu haqda 29-sentabr kuni Sanepidqo‘mitada bo‘lib o‘tgan aholini toza ichimlik suvi bilan taʼminlashga bag‘ishlangan anjumanda maʼlum qilindi, deya xabar bermoqda “Daryo” muxbiri.
Taʼkidlanishicha, jami 10 ming 562 ta davolash-profilaktika muassasalari bo‘lib, ularning 57 foizi markazlashtirilgan ichimlik suvi tarmog‘iga ulangan. Qolgan 33 foiziga esa ichimlik suvi manbaidan tashib kelinadi.
Yig‘ilishda ishtirok etgan Oliy Majlisi Qonunchilik palatasi deputati Maqsuda Vorisovaning aytishicha, tibbiyot muassasalarida: sanitariya epidemiologiya muassasalarida, qishloq vrachlik punktlarida, oilaviy poliklinikalarda va tug‘uruqxonalarda suv yetishmasligi kuzatilmoqda.
“Agar biz tibbiy muassasaga suv yetkazib berolmasak, unda qanday qilib bizga taqdim etilgan va lozim bo‘lgan standartlarni bajaramiz? Qo‘lni tozalab yuvish imkoni bo‘lmagan sharoitda qanday qilib aholiga sifatli tibbiy yordam ko‘rsatamiz?
Respublikamizda baʼzi-baʼzida epizotik holatlar yuzaga keladiki, unda xavfli infeksiyalar ham uchraydi. Ularning tarqalishini hammamiz bilamiz — faqat suv bilan bog‘liq”, — dedi Maqsuda Vorisova.
Deputatning taʼkidlashicha, nazorat-tahlil tadbirlari o‘tkazilganida Sirdaryo viloyatidagi baʼzi shifoxonalarda ichimlik suvi tashib keltirilayotgani, poytaxtning yonidagi Toshkent viloyatining bir nechta tumanlaridagi shifoxona suv tarmoqlarida suv yo‘qligi aniqlangan.
“Hozir faqat tibbiyot muassasalari haqida gapiryapmiz, lekin taʼlim muassasalarida, maktab va bog‘chalarda ichimlik suvi yo‘qligi bu bugungi kun uchun, XXI asr uchun, rivojlanayotgan O‘zbekistonimiz uchun chidab bo‘lmaydigan holat, deb baholashimiz mumkin.
Bolalarimizga bugundan boshlab suvdan to‘g‘ri foydalanish, qadriga yetishni o‘rgatmas ekanmiz va ularni suv bilan taʼminlamas ekanmiz, o‘zimiz istagan barkamol, sog‘lom avlodni yetishtirishimiz, tarbiyalashimiz xavf ostida qoladi”, – dedi u.
Izoh (0)