Даволаш-профилактика муассасаларининг 33 фоизига ичимлик суви ташиб келинади. Бу ҳақда 29 сентябрь куни Санэпидқўмитада бўлиб ўтган аҳолини тоза ичимлик суви билан таъминлашга бағишланган анжуманда маълум қилинди, дея хабар бермоқда “Дарё” мухбири.
Таъкидланишича, жами 10 минг 562 та даволаш-профилактика муассасалари бўлиб, уларнинг 57 фоизи марказлаштирилган ичимлик суви тармоғига уланган. Қолган 33 фоизига эса ичимлик суви манбаидан ташиб келинади.
Йиғилишда иштирок этган Олий Мажлиси Қонунчилик палатаси депутати Мақсуда Ворисованинг айтишича, тиббиёт муассасаларида: санитария эпидемиология муассасаларида, қишлоқ врачлик пунктларида, оилавий поликлиникаларда ва туғуруқхоналарда сув етишмаслиги кузатилмоқда.
“Агар биз тиббий муассасага сув етказиб беролмасак, унда қандай қилиб бизга тақдим этилган ва лозим бўлган стандартларни бажарамиз? Қўлни тозалаб ювиш имкони бўлмаган шароитда қандай қилиб аҳолига сифатли тиббий ёрдам кўрсатамиз?
Республикамизда баъзи-баъзида эпизотик ҳолатлар юзага келадики, унда хавфли инфекциялар ҳам учрайди. Уларнинг тарқалишини ҳаммамиз биламиз — фақат сув билан боғлиқ”, — деди Мақсуда Ворисова.
Депутатнинг таъкидлашича, назорат-таҳлил тадбирлари ўтказилганида Сирдарё вилоятидаги баъзи шифохоналарда ичимлик суви ташиб келтирилаётгани, пойтахтнинг ёнидаги Тошкент вилоятининг бир нечта туманларидаги шифохона сув тармоқларида сув йўқлиги аниқланган.
“Ҳозир фақат тиббиёт муассасалари ҳақида гапиряпмиз, лекин таълим муассасаларида, мактаб ва боғчаларда ичимлик суви йўқлиги бу бугунги кун учун, XXI аср учун, ривожланаётган Ўзбекистонимиз учун чидаб бўлмайдиган ҳолат, деб баҳолашимиз мумкин.
Болаларимизга бугундан бошлаб сувдан тўғри фойдаланиш, қадрига етишни ўргатмас эканмиз ва уларни сув билан таъминламас эканмиз, ўзимиз истаган баркамол, соғлом авлодни етиштиришимиз, тарбиялашимиз хавф остида қолади”, – деди у.
Изоҳ (0)