“O‘zLiDep press-klubi”ning navbatdagi sessiyasida yashirin iqtisodiyotni qisqartirish, rasmiy faoliyat ko‘rsatayotgan tadbirkorlarni qo‘llab-quvvatlash masalalari muhokama qilindi. Bu haqda “Daryo” muxbiri xabar berdi.
Muloqotda Oliy Majlis Qonunchilik palatasi va mahalliy kengashlar deputatlari, vazirlik va idoralar, olimlar, tadbirkorlar va OAV vakillari ishtirok etdi.
Suhbatda aytilishicha, hozirda O‘zbekistonda xufiyona iqtisodiyotning ulushi yalpi ichki mahsulotga nisbatan 40 foiz atrofida bo‘lib, bu taxminan 32 milliard dollarga baholanmoqda.
Mazkur qiymat asosan, ko‘chmas mulk va transport vositalarining ikkilamchi bozorida, ulgurji va chakana savdo, xizmat ko‘rsatish, tamaki mahsulotlari kontrabandasi, noqonuniy tovarlar aylanmasi, qishloq xo‘jaligi va boshqalar hisobiga to‘g‘ri kelmoqda.
Bojxona qo‘mitasi boshqarma boshlig‘i Ulug‘bek Qosimovning taʼkidlashicha, chegaralardan noqonuniy ravishda olib o‘tilayotganda ushlangan tovarlarning katta qismi tamaki mahmulotlari hissasiga to‘g‘ri kelmoqda.
“Tamaki mahsulotlari noqonuniy aylanishiga sabab import bojlari va autsiz soliqlarining yuqoriligi bilan bog‘liq. Joriy yilning o‘tgan davrida jami 75,2 milliard so‘mlik, jami 4,7 million quti noqonuniy tamaki mahsulotlari aniqlangan. Bu o‘tgan yilning mos davriga nisbatan 5 barobar yuqori ko‘rsatkich”, — dedi mutaxassis.
Toshkent davlat iqtisodiyot universiteti tomonidan o‘tkazilgan tadqiqotga ko‘ra, 2023-yilning dastlabki yetti oyida hududlarda noqonuniy tamaki savdosi darajasi 20 foizdan oshgan. Bu kontrabanda yo‘li bilan olib kirilib, bir yilda davlat byudjetiga o‘rtacha 2 trillion so‘m tushmasligi xavfini yuzaga keltirmoqda.
“Yurtimizda to‘g‘ri ishlayotgan, ish o‘rni yaratayotgan, ilg‘or texnologiyalar joriy qilib, yangi mahsulotlarni o‘zlashtirayotgan, eksportini oshirayotgan biznes vakillari uchun barcha sharoitlar yaratib berilmoqda.
Biroq shunga qaramasdan, soliqlardan qochib, o‘zining majburiyatlarini bajarmasdan kelayotgan qo‘shtirnoq ichidagi tadbirkorlarning xali ham mavjudligi butun jamoatchilikni tashvishga solishi lozim”, — deydi O‘zLiDep bo‘lim mudiri Baxtiyor Ruhiddinov.
Press klub davomida xufiyona iqtisodiyot mavjud bo‘lgan sohalar tahlil qilinib, ular bilan aniq manzilli kurashilishi lozimligi taʼkidlandi.
Izoh (0)