Senatning Budjet va iqtisodiy islohotlar masalalari qo‘mitasining majlisida “Soliq va byudjet qonunchiligi takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonun ko‘rib chiqildi. Bu haqda parlament yuqori palatasi matbuot xizmati xabar berdi.
Qonun bilan budjet tashkilotlariga ijaraga berilgan yer uchastkalaridan soliq undirish va to‘lash tartibini, foydalanilmayotgan binolar, ishlab chiqarish maydonlari va yer uchastkalariga nisbatan tegishli soliqlarning oshirilgan stavkalarini qo‘llash tartibi bekor qilinmoqda.
Shuningdek, qo‘mita majlisida “Yer to‘g‘risidagi qonunchilik takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida”gi qonun ham muhokama qilingan.
Ushbu qonunda ijaraga olingan qishloq xo‘jaligiga mo‘ljallanmagan yer uchastkalari huquq va majburiyatlar bilan birga ijaraga beruvchining roziligi asosida boshqa shaxsga o‘tkazilishi (qayta ijaraga berilishi) mumkinligi belgilanmoqda.
Shu bilan birga, jismoniy va yuridik shaxslar tomonidan elektron onlayn-auksion orqali olingan qishloq xo‘jaligiga mo‘ljallanmagan yer uchastkalariga nisbatan huquq va majburiyatlar boshqa shaxsga ijara muddatidan oshmagan muddatga o‘tkazilishi (qayta ijaraga berilishi) mumkinligi ko‘zda tutilgan.
“Senatorlar qonun bilan yerga oid mulkiy va huquqiy munosabatlarda barqarorlikni taʼminlash, ularni muhofaza qilish, yer egalarining mulkiy huquqlarini kafolatlash maqsadida qonun hujjatlaridagi bo‘shliqlar bartaraf etilayotganligi eʼtibor qaratishdi”, — deyiladi xabarda.
Xususan, ushbu ko‘rib chiqilayotgan qonunda o‘zganing yer uchastkasidan cheklangan tarzda foydalanish huquqi, yaʼni servitut belgilangan yer uchastkasiga bo‘lgan huquqlar boshqa shaxsga o‘tgan taqdirda ham servitut saqlanib qolinishi, servitut oldi-sotdi, hadya, garov yoki ijaraning mustaqil predmeti bo‘lishi mumkin emasligi belgilanyapti.
Servitut belgilanishi yer egasini, yerdan foydalanuvchini, yer uchastkasining ijarachisi va mulkdorini ushbu yer uchastkasiga egalik qilish, undan foydalanish hamda uni tasarruf etish huquqidan mahrum etilmasligi ko‘zda tutilmoqda. Muhokama yakuni bo‘yicha ko‘rib chiqilgan masalalar yuzasidan qo‘mitaning tegishli qarori qabul qilingan.
Avvalroq O‘zbekistonda 2023-yil boshidan beri 3 ming gektardan ortiq yerlar o‘zboshimchalik bilan egallab olingani to‘g‘risida xabar berilgandi. Shundan qonun buzilishi holatini ixtiyoriy bartaraf etganlar soni 4235 taga yetgan.