Turizm qo‘mitasi huzuridagi “Milliy PR-markazi” davlat unitar korxonasi rahbari tilla taqinchoqlar do‘koni asoschisi ekani aniqlangani to‘g‘risida xabar berilgandi. Turizm qo‘mitasi mazkur holatga munosabat bildirdi.
Qayd etilishicha, 20-sentabr kuni Korrupsiyaga qarshi kurashish agentligi tomonidan kelib tushgan taqdimnomaga binoan, Turizm qo‘mitasi huzuridagi “Milliy PR-markazi” DUK direktori Dilfuza Samandarovaning Avtoimkon Trade MCHJ taʼsischiligidagi faoliyatini tugatish, tadbirkorlik faoliyati bilan shug‘ullanmaslik va kelgusida shu kabi holatlarga yo‘l qo‘ymaslik haqida rasman ogohlantirish o‘tkazish va tushuntirish ishlari olib borish choralarini ko‘rish so‘ralgan.
Ta’kidlanishicha, yuqorida keltirilgan taqdimnomaga binoan qo‘mitaning ishchi guruhi tuzilib, xizmat tekshiruvi olib borilmoqda.
“Qo‘mita ushbu holatni alohida nazoratga olganligini hamda tekshiruv natijasi yuzasidan Korrupsiyaga qarshi kurashish agentligiga belgilangan muddatlarda axborot taqdim etilishini maʼlum qiladi”, — deyiladi munosabatda.
Dilfuza Samandarova 2023-yil 22-fevralda davlat ro‘yxatidan o‘tkazilgan Avtoimkon Trade MCHJda 50 foizlik ulush bilan ta’sischi hisoblanadi. Shuningdek, u ijtimoiy tarmoq orqali Toshkent shahar markazida joylashgan tilla taqinchoqlar do‘koni asoschisi ekanini bayon qilgan va ushbu do‘konning ijobiy xususiyatlarini reklama qilgan.
“Davlat fuqarolik xizmati to‘g‘risida”gi qonun 2022-yil 8-avgust kuni prezident tomonidan imzolangan. Unga ko‘ra, davlat xizmatchisi tadbirkorlik bilan shug‘ullanishi, ularning muassisi bo‘lishi, O‘zbekistondan tashqarida hisobvaraqlar ochishi, chet elda ko‘chmas mulk olishi taqiqlanadi. Davlat xizmachisi daromadlari va mol-mulki to‘g‘risida deklaratsiya berishi kerak.
Avgust boshlarida madaniyat vaziri Ozodbek Nazarbekov tadbirkorlik subyekti ulushdori ekani to‘g‘risida xabar berilgandi. U “Ohangaron mo‘jiza bog‘i” MCHJning 40 foiz ulushiga egalik qilmoqda.
Izoh (0)