Туризм қўмитаси ҳузуридаги “Миллий PR-маркази” давлат унитар корхонаси раҳбари тилла тақинчоқлар дўкони асосчиси экани аниқлангани тўғрисида хабар берилганди. Туризм қўмитаси мазкур ҳолатга муносабат билдирди.
Қайд этилишича, 20 сентябрь куни Коррупцияга қарши курашиш агентлиги томонидан келиб тушган тақдимномага биноан, Туризм қўмитаси ҳузуридаги “Миллий PR-маркази” ДУК директори Дилфуза Самандарованинг Avtoimkon Trade МЧЖ таъсисчилигидаги фаолиятини тугатиш, тадбиркорлик фаолияти билан шуғулланмаслик ва келгусида шу каби ҳолатларга йўл қўймаслик ҳақида расман огоҳлантириш ўтказиш ва тушунтириш ишлари олиб бориш чораларини кўриш сўралган.
Таъкидланишича, юқорида келтирилган тақдимномага биноан қўмитанинг ишчи гуруҳи тузилиб, хизмат текшируви олиб борилмоқда.
“Қўмита ушбу ҳолатни алоҳида назоратга олганлигини ҳамда текширув натижаси юзасидан Коррупцияга қарши курашиш агентлигига белгиланган муддатларда ахборот тақдим этилишини маълум қилади”, — дейилади муносабатда.
Дилфуза Самандарова 2023 йил 22 февралда давлат рўйхатидан ўтказилган Avtoimkon Trade МЧЖда 50 фоизлик улуш билан таъсисчи ҳисобланади. Шунингдек, у ижтимоий тармоқ орқали Тошкент шаҳар марказида жойлашган тилла тақинчоқлар дўкони асосчиси эканини баён қилган ва ушбу дўконнинг ижобий хусусиятларини реклама қилган.
“Давлат фуқаролик хизмати тўғрисида”ги қонун 2022 йил 8 август куни президент томонидан имзоланган. Унга кўра, давлат хизматчиси тадбиркорлик билан шуғулланиши, уларнинг муассиси бўлиши, Ўзбекистондан ташқарида ҳисобварақлар очиши, чет элда кўчмас мулк олиши тақиқланади. Давлат хизмачиси даромадлари ва мол-мулки тўғрисида декларация бериши керак.
Август бошларида маданият вазири Озодбек Назарбеков тадбиркорлик субъекти улушдори экани тўғрисида хабар берилганди. У “Оҳангарон мўжиза боғи” МЧЖнинг 40 фоиз улушига эгалик қилмоқда.
Изоҳ (0)