O‘zbekiston OTMlari va Shvetsiya universiteti o‘rtasida o‘qituvchi va talabalar almashinuvi yo‘lga qo‘yiladi

O‘zbekiston va Shvetsiya o‘qituvchilarni tayyorlash bo‘yicha qo‘shma dasturlar ishlab chiqadi. Bu haqda “Dunyo” xabar berdi.

Ma’lum qilinishicha, O‘zbekistonning Shvetsiyadagi elchixonasi, Finlyandiyaning O‘zbekistondagi Faxriy konsulligi va Nordik xalqaro universiteti tomonidan O‘zbekistonning 11 ta oliy ta’lim muassasasidan 24 kishilik delegatsiyaning Stokgolmga tashrifi amalga oshirildi.

Safar doirasida o‘zbek delegatsiyasining Syodertyorn universiteti rektori professor Gustav Amberg, prorektori professor Anna Mariya Yonsson, ushbu universitet qoshidagi Boltiq va Sharqiy Yevropa tadqiqotlari markazi xodimlari va tadqiqotchilari bilan uchrashuvlari tashkil etildi.

Muzokaralar davomida O‘zbekiston OTMlari va Syodertyorn universiteti o‘rtasida pedagog va o‘qituvchilarni tayyorlash sohasida qo‘shma dasturlarni ishlab chiqish, o‘qituvchi va talabalar almanishuvini yo‘lga qo‘yish, Shvetsiyada qisqa malaka oshirish kurslarini tashkil qilish, Toshkent va Stokgolmda qo‘shma konferensiyalar va seminarlar o‘tkazish hamda boshqa bir qator yo‘nalishlarda hamkorlik aloqalarini o‘rnatish masalalari muhokama qilindi.

Shuningdek, O‘zbekiston delegatsiyasi a’zolari Syodertyorn universiteti huzuridagi Boltiq va Sharqiy Yevropa tadqiqotlari markaziga tashrif buyurib, ushbu markaz faoliyati bilan yaqindan tanishdi, professor va doktorantura talabalari bilan turli masalalar yuzasidan fikr almashildi.

Tashrif yakunida Syodertyorn universiteti bilan qator sohalarda hamkorlik qilish bo‘yicha muhim kelishuvlarga erishildi.