Ўзбекистон ва Швеция ўқитувчиларни тайёрлаш бўйича қўшма дастурлар ишлаб чиқади. Бу ҳақда “Дунё” хабар берди.
Маълум қилинишича, Ўзбекистоннинг Швециядаги элчихонаси, Финляндиянинг Ўзбекистондаги Фахрий консуллиги ва Нордик халқаро университети томонидан Ўзбекистоннинг 11 та олий таълим муассасасидан 24 кишилик делегациянинг Стокгольмга ташрифи амалга оширилди.
Сафар доирасида ўзбек делегациясининг Сёдертёрн университети ректори профессор Густав Амберг, проректори профессор Анна Мария Йонссон, ушбу университет қошидаги Болтиқ ва Шарқий Европа тадқиқотлари маркази ходимлари ва тадқиқотчилари билан учрашувлари ташкил этилди.
Музокаралар давомида Ўзбекистон ОТМлари ва Сёдертёрн университети ўртасида педагог ва ўқитувчиларни тайёрлаш соҳасида қўшма дастурларни ишлаб чиқиш, ўқитувчи ва талабалар алманишувини йўлга қўйиш, Швецияда қисқа малака ошириш курсларини ташкил қилиш, Тошкент ва Стокгольмда қўшма конференциялар ва семинарлар ўтказиш ҳамда бошқа бир қатор йўналишларда ҳамкорлик алоқаларини ўрнатиш масалалари муҳокама қилинди.
Шунингдек, Ўзбекистон делегацияси аъзолари Сёдертёрн университети ҳузуридаги Болтиқ ва Шарқий Европа тадқиқотлари марказига ташриф буюриб, ушбу марказ фаолияти билан яқиндан танишди, профессор ва докторантура талабалари билан турли масалалар юзасидан фикр алмашилди.
Ташриф якунида Сёдертёрн университети билан қатор соҳаларда ҳамкорлик қилиш бўйича муҳим келишувларга эришилди.
Изоҳ (0)