O‘zbekiston hukumati hokimliklarga kommunal xizmatlar tariflarini qayta ko‘rib chiqishni tavsiya qildi. Bu haqda 1-oktabrdan kuchga kiradigan “Yoqilg‘i-energetika sohasida bozor mexanizmlarini joriy etishning qo‘shimcha chora-tadbirlari to‘g‘risida”gi Vazirlar Mahkamasi qarorida so‘z boradi.
Qarorda Vazirlar Mahkamasi Qoraqalpog‘iston Vazirlar Kengashi, viloyatlar hokimliklari va Toshkent shahri hokimligiga issiqlik ta’minoti, suv ta’minoti va kanalizatsiya xizmatlari, shahar yo‘lovchi transportida (taksilardan tashqari) yo‘lovchilarni tashish xizmatlari uchun yangi tariflarni belgilashni tavsiya qilgan. Shu bilan birga, kuz-qish mavsumida aholi uchun issiqlik ta’minoti xizmatlari narxi oshib ketmasligi qayd etilgan.
Iqtisodiyot va moliya vazirligiga tariflarni qayta ko‘rib chiqishda narxlarning asossiz oshib ketishiga yo‘l qo‘ymaslik topshirig‘i berilgan.
Vazirlar Mahkamasi huzuridagi Idoralararo tarif komissiyasiga 2023-yil 1-oktabrdan boshlab quyidagilarni qayta ko‘rib chiqish topshirilgan:
- tabiiy gaz va elektr energiyasini ishlab chiqarish, uzatish, taqsimlash, sotish tariflarini hamda issiqlik energiyasini ishlab chiqarish tariflarini;
- elektr va issiqlik energiyasi, shuningdek, tabiiy gaz iste’molchilaridan va ulgurji qayta sotuvchilardan tushadigan mablag‘larni taqsimlash tartibini;
- temiryo‘l transportida yuk va yo‘lovchilarni tashish xizmatlari va boshqa tariflarni.
16-sentabr kuni “Yoqilg‘i-energetika sohasida bozor mexanizmlarini joriy etishning qo‘shimcha chora-tadbirlari to‘g‘risida”gi hukumat qarori qabul qilingandi. Qarorga ko‘ra, aholi uchun 1 kVt/soat elektr energiyasi narxi o‘zgarishsiz — 295 so‘m qoladi. Tabiiy gazni sotishda uning eng baland chakana narxi kelgusi olti oyda bir kub metr uchun 3250 so‘mdan oshib ketmasligi bo‘yicha qatʼiy choralar ko‘riladi.
Izoh (0)