Ўзбекистон ҳукумати ҳокимликларга коммунал хизматлар тарифларини қайта кўриб чиқишни тавсия қилди. Бу ҳақда 1-октябрдан кучга кирадиган “Ёқилғи-энергетика соҳасида бозор механизмларини жорий этишнинг қўшимча чора-тадбирлари тўғрисида”ги Вазирлар Маҳкамаси қарорида сўз боради.
Қарорда Вазирлар Маҳкамаси Қорақалпоғистон Вазирлар Кенгаши, вилоятлар ҳокимликлари ва Тошкент шаҳри ҳокимлигига иссиқлик таъминоти, сув таъминоти ва канализация хизматлари, шаҳар йўловчи транспортида (таксилардан ташқари) йўловчиларни ташиш хизматлари учун янги тарифларни белгилашни тавсия қилган. Шу билан бирга, куз-қиш мавсумида аҳоли учун иссиқлик таъминоти хизматлари нархи ошиб кетмаслиги қайд этилган.
Иқтисодиёт ва молия вазирлигига тарифларни қайта кўриб чиқишда нархларнинг асоссиз ошиб кетишига йўл қўймаслик топшириғи берилган.
Вазирлар Маҳкамаси ҳузуридаги Идоралараро тариф комиссиясига 2023 йил 1-октябрдан бошлаб қуйидагиларни қайта кўриб чиқиш топширилган:
- табиий газ ва электр энергиясини ишлаб чиқарисҳ, узатиш, тақсимлаш, сотиш тарифларини ҳамда иссиқлик энергиясини ишлаб чиқариш тарифларини;
- электр ва иссиқлик энергияси, шунингдек, табиий газ истеъмолчиларидан ва улгуржи қайта сотувчилардан тушадиган маблағларни тақсимлаш тартибини;
- темирйўл транспортида юк ва йўловчиларни ташиш хизматлари ва бошқа тарифларни.
16 сентябрь куни “Ёқилғи-энергетика соҳасида бозор механизмларини жорий этишнинг қўшимча чора-тадбирлари тўғрисида”ги ҳукумат қарори қабул қилинганди. Қарорга кўра, аҳоли учун 1 кВт/соат электр энергияси нархи ўзгаришсиз — 295 сўм қолади. Табиий газни сотишда унинг энг баланд чакана нархи келгуси олти ойда бир куб метр учун 3250 сўмдан ошиб кетмаслиги бўйича қатъий чоралар кўрилади.
Изоҳ (0)