Shavkat Mirziyoyev: Afg‘onistonni o‘z muammolari bilan yana yolg‘iz qoldirish — bu katta xato bo‘ladi

BMT Bosh Assambleyasining 78-sessiyasida so‘zlagan nutqida dunyo hamjamiyatini Afg‘oniston muammosini hal etish yo‘lida birlashishga chaqirdi.

“Afg‘onistonni o‘z muammolari bilan yana yolg‘iz qoldirish — bu katta xato bo‘ladi. Inkor qilish, yakkalab qo‘yish va sanksiyalar qo‘llash oddiy afg‘on xalqining ahvolini yanada og‘irlashtirmoqda”, — dedi prezident.

Davlat rahbarining ta’kidlashicha, xalqaro xavfsizlik Afg‘onistondagi jarayonlar bilan bevosita bog‘liqdir. Ushbu mamlakatda yangi vaziyat vujudga kelgan bo‘lib, u afg‘on masalasini hal etishda o‘ziga xos yondashuvlarni talab etmoqda.

“Afg‘on xalqiga insonparvarlik yordami ko‘rsatishni susaytirmaslik lozim, deb hisoblaymiz. Afg‘onistonning muzlatilgan xalqaro aktivlarini bu yurtdagi o‘tkir ijtimoiy muammolarni hal etishga yo‘naltirish uchun maqbul mexanizmlarni ishlab chiqishga chaqiramiz. Bizga tinch va barqaror, mintaqaviy hamkorlik jarayonlarida ishtirok etadigan, qo‘shnilari va boshqa mamlakatlar bilan o‘zaro manfaatli sheriklik uchun ochiq Afg‘oniston kerak”, — deb qayd etdi prezident.

Shavkat Mirziyoyev BMT minbaridan turib, dunyo hamjamiyatini Afg‘oniston muammosini hal etish yo‘lida birlashishga chaqirdi. Bu borada BMT rahnamoligida Afg‘oniston bo‘yicha birgalikda ishlab chiqilgan, vaziyatga moslashuvchan va konstruktiv pozitsiyani belgilash printsipial jihatdan muhim, deb hisoblashini aytdi.