Qashqadaryo viloyatida tuman soliq inspeksiyasi bosh inspektori tadbirkorlik subyektlarining faoliyatini tekshirish va moliya-xo‘jalik faoliyatini taftish qilish tartibini buzganlik uchun javobgarlikka tortildi. Bu haqda O‘zbekiston Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish bo‘yicha vakil (Biznes-ombudsman) maʼlum qildi.
Aytilishicha, Dehqonobod tuman soliq inspeksiyasi bosh inspektori 2021-yilda yakka tartibdagi tadbirkor (YTT) faoliyatida noqonuniy tekshirish o‘tkazilganligi sababli, Maʼmuriy javobgarlik to‘g‘risidagi kodeksining 241 prim 2-moddasi (tadbirkorlik subyektlarining faoliyatini tekshirish va moliya-xo‘jalik faoliyatini taftish qilish tartibini buzish) bilan maʼmuriy jarima jazosi qo‘llanilgan.
“Shunga qaramasdan, masʼul xodim tomonidan takroriy tarzda jami 3 ta tadbirkorlik subyektlari faoliyatida o‘tkazilgan tekshirishlarda belgilangan talablarga rioya qilmagan.
Ushbu qonun buzilish holati Vakil devonining Qashqadaryo viloyatidagi sho‘basi tomonidan Dehqonobod tuman prokuraturasiga aloqa xati orqali maʼlum qilinib, tegishli hujjatlar taqdim qilingan.
Holat yuzasidan Dehqonobod tuman prokuraturasi tomonidan masʼul xodimga nisbatan Jinoyat kodeksining 192 prim 2-moddasi (Tadbirkorlik subyektlarining faoliyatini tekshirish va moliya-xo‘jalik faoliyatini taftish qilish tartibini buzish) ikkinchi qismi “a” (ko‘p miqdorda zarar yetkazgan holda) bandi bilan jinoyat ishi qo‘zg‘atilgan”, - deyiladi Biznes-ombudsman axborotida.
Jinoyat ishlari bo‘yicha Mirishkor tuman sudining hukmi bilan Soliq inspeksiyasi masʼul xodimi jinoyat sodir etganlikda aybli deb topilgan. Unga nisbatan Jinoyat kodeksining 45-moddasiga (muayyan huquqdan mahrum qilish) bilan 1 yil muddatga davlat ishtirokidagi tashkilotlarda mansabdorlik va moddiy javobgarlik yuklatilgan vazifalarda ishlash huquqidan mahrum qilingan holda, bazaviy hisoblash miqdorining 100 baravari (33 million so‘m) miqdorida jarima jazosi qo‘llanilgan.
Maʼlumot uchun, Jinoyat kodeksining 192 prim 2-moddasi (Tadbirkorlik subyektlarining faoliyatini tekshirish va moliya-xo‘jalik faoliyatini taftish qilish tartibini buzish) ikkinchi qismi “a” (ko‘p miqdorda zarar yetkazgan holda) bandi — bazaviy hisoblash miqdorining uch yuz baravaridan besh yuz baravarigacha miqdorda jarima yoki muayyan huquqdan mahrum qilib, uch yildan besh yilgacha ozodlikni cheklash yoxud uch yildan besh yilgacha ozodlikdan mahrum qilish bilan jazolanadi.
Izoh (0)