Qashqadaryo viloyatining Qarshi shahrida otasi tomonidan yashirib yurilgan bola topilib, sud qarori bilan onasiga qaytarib berildi. Bu haqda MIB axborot xizmati “Daryo”ga maʼlum qildi.
Xabarda aytilishicha, fuqaro I.S. ajrashgan eridan farzandini olib berish bo‘yicha sudga murojaat qilgan. Sud bolani olib berish bo‘yicha qaror chiqargan.
“Qaror Majburiy ijro byurosining Muborak tuman bo‘limi ish yurituviga qabul qilindi. Davlat ijrochisi bir necha marotaba manzilga borsa-da, bolani topolmadi. Ota I.J. maʼmuriy javobgarlikka tortilsa-da, farzandini onasiga qaytarmadi. Ammo onasi Byuro organlariga murojaat qilishda davom etdi, sababi bolasi maktab yoshiga yetgan edi”, - deyiladi MIB maʼlumotida.
Shundan so‘ng, davlat ijrochisi tomonidan bolani qidirish bo‘yicha qaror chiqarilgan. Boshqarma qidiruv sho‘basi xodimlarining saʼy-harakatlari natijasida bola Qarshi shahridagi maktablarning biriga joylashtirilganligi aniqlandi va onasiga qaytariladi.
Avvalroq Namanganda qidiruvga berilgan bola Toshkent viloyatidagi chayladan topilgani haqida xabar qilingan edi.
Izoh (0)