Қашқадарё вилоятининг Қарши шаҳрида отаси томонидан яшириб юрилган бола топилиб, суд қарори билан онасига қайтариб берилди. Бу ҳақда МИБ ахборот хизмати “Дарё”га маълум қилди.
Хабарда айтилишича, фуқаро И.С. ажрашган эридан фарзандини олиб бериш бўйича судга мурожаат қилган. Суд болани олиб бериш бўйича қарор чиқарган.
“Қарор Мажбурий ижро бюросининг Муборак туман бўлими иш юритувига қабул қилинди. Давлат ижрочиси бир неча маротаба манзилга борса-да, болани тополмади. Ота И.Ж. маъмурий жавобгарликка тортилса-да, фарзандини онасига қайтармади. Аммо онаси Бюро органларига мурожаат қилишда давом этди, сабаби боласи мактаб ёшига етган эди”, - дейилади МИБ маълумотида.
Шундан сўнг, давлат ижрочиси томонидан болани қидириш бўйича қарор чиқарилган. Бошқарма қидирув шўбаси ходимларининг саъй-ҳаракатлари натижасида бола Қарши шаҳридаги мактабларнинг бирига жойлаштирилганлиги аниқланди ва онасига қайтарилади.
Аввалроқ Наманганда қидирувга берилган бола Тошкент вилоятидаги чайладан топилгани ҳақида хабар қилинган эди.
Изоҳ (0)