Isroil bosh vaziri Binyamin Netanyaxuning AQSHga tashrifi oldidan 17-sentabr kuni minglab namoyishchilar Tel-Avivda hukumat siyosatiga qarshi haftalik mitingga to‘plandi, deb xabar bermoqda OAV. Namoyishchilar Isroilning 1948-yilgi Mustaqillik deklaratsiyasi katta nusxasini ko‘tarib olgan.
Isroil davlati tashkil topganini e’lon qilgan va mamlakat tuzilishining asosiy tamoyillarini belgilab beruvchi hujjatning qonuniyligi mamlakat parlamenti (Knesset) tomonidan o‘tkazilayotgan sud-huquq islohotlari doirasida 12-sentabr kuni Isroil Oliy sudida muhokama mavzusiga aylandi.
Sudda hukumat pozitsiyasini himoya qilgan advokat Mustaqillik deklaratsiyasi qonuniy kuchga ega emasligini ta’kidladi. Bu norozilik namoyishlari va muxolifatning tanqidiga sabab bo‘ldi.
Isroil parlamenti Oliy sud vakolatlarini chekladi
24-iyul kuni Knesset tomonidan ma’qullangan sud-huquq islohotlari paketidagi birinchi qonun loyihasi Oliy sudning hukumat qarorlarini bekor qilish borasidagi vakolatini cheklaydi. Muxolifatdagi parlamentariylar qonun loyihasi bo‘yicha ovoz berishni boykot qildi, hukmron koalitsiyaning 64 deputati uni yoqladi. Bu hujjat qabul qilinishi uchun yetarli bo‘ldi. Islohot tanqidchilarining fikricha, tuzatishlar hukumat ustidan nazoratning samarali mexanizmlaridan birini olib tashlaydi va shu bilan hokimiyatni suiiste’mol qilish imkoniyatlarini yaratadi.
Sud-huquq islohotlarining boshqa qoidalari Oliy sud sudyalarini tayinlash tartibini o‘zgartirishni nazarda tutadi. Muxolifat va qonun loyihalari tanqidchilariga ko‘ra, Isroilda sud-huquq islohoti mustaqil sud tizimining yo‘q bo‘lib ketishiga olib keladi va demokratiya asoslariga putur yetkazadi. Unga qarshi namoyishlar mamlakatda 37 haftadan beri davom etmoqda.
Odatda norozilik namoyishlari shanba kunlari bo‘lib o‘tadi, biroq bu hafta tashkilotchilar yahudiylarning yangi yili — Rosh Xashanani nishonlash munosabati bilan mitingni yakshanba kuniga ko‘chirdi.
Izoh (0)