“Men qo‘rqadigan yoshdan o‘tganman”. “Nasaf”, “Navbahor” va “OKMK” murabbiylari OCHL bahslari startidan oldin matbuot anjumanida ishtirok etdi

Futbol bo‘yicha Osiyo Chempionlar Ligasi bahslari 18-sentabr, dushanba kuni start oladi.

Bugun O‘zbekistonning uchta jamoasi: “Nasaf”, “Navbahor” va “OKMK” musobaqadagi ishtirokini boshlaydi. Uchala klub bosh murabbiylari o‘yin oldidan matbuot anjumanida ishtirok etdi.

Bu juda katta turnir. Raqib jamoasining o‘yinlarini o‘rganib chiqdik. Ular hujumkor o‘yin namoyish qiladi. “Nasaf”ning musobaqadagi asosiy maqsadi o‘tgan yilgidek guruhdan chiqib, imkon qadar uzoqroq bosqichga borish.

Ro‘ziqul Berdiyev, “Nasaf” bosh murabbiyi

Qarshining “Nasaf” jamoasi “Al-Faysali”ga qarshi bahs olib boradi. Uchrashuv 21:00 da start oladi. 

Jamoamiz Osiyo Chempionlar Ligasi (OChL) guruh bahslari doirasidagi ilk bahsda maydonga tushadi. Ochig‘ini aytish kerak, mazkur nufuzli musobaqaning guruh bahslari qur’asi oldidan biz shunday darajadagi raqibga qarshi o‘ynashni xohlagandik.

Yana shuni ham ta’kidlamoqchimanki, biz ertaga Osiyoning eng kuchli jamoasiga qarshi o‘ynaymiz. Saudiya Arabistoni futbolida yuz berayotgan islohotlar samarasi o‘laroq, “Al-Hilol”ning har bir chizig‘ida top futbolchilar jamlanishgan, tarkibidan zamonaviy futbolimiz yulduzlari o‘rin olishgan.

Xo‘sh, kuchli raqibga qarshi qanday o‘yin namoyish etish kerak? Buning uchun futbolchilardan avvalo, yuqori saviyali o‘yin, intizomga bo‘ysunish va fidoyilik talab etiladi. Shuningdek, biroz omad ham kerak.  

“Al-Hilol” singari kuchli klubga qarshi kechadigan ertangi o‘yinda mo‘jizaga ham umid qilamiz.

OChL guruh bahslarida yurtimiz sharafini himoya qiladigan “Navbahor” bilan ijobiy natijaga erishishni judayam xohlaymiz va klub bilan OChL musobaqasida ham o‘z oldiga qo‘yilgan vazifani bajarishi uchun qo‘limizdan kelganicha harakat qilamiz.

Samvel Babayan, “Navbahor” bosh murabbiyi

“Navbahor” klubining “Al-Hilol”ga qarshi bahsi 23:00 da start oladi.

Men qo‘rqadigan yoshdan o‘tganman. “Al-Ittihod”ni boshqa raqiblarimiz singari hurmat qilamiz. O‘ylaymanki, chiroyli o‘yinga guvoh bo‘lamiz.

Mirjalol Qosimov, “OKMK” bosh murabbiyi

“OKMK” va “Al-Ittihod” o‘rtasidagi bahs 21:00 da start oladi.